ވެލާނާ އިންޓަނޭޝަނަލް އެއާޕޯޓުން ޑްރަގު ފެނުނީ އިންޑިއާއިން އައި ދެމަފިރިއެއްގެ އަތުންނެވެ. އެމީހުން އަތުންވަނީ 2 ކިލޯގެ ހެރޮއިން ފެނިފައެވެ.
ހައްޔަރުކުރި އިންޑިއާ ދެމަފިރިން
- 41 އަހަރުގެ މުހައްމަދު ޝޯއިބް
- އޭނާގެ އަންހެނުން އުމުރުން 38 އަހަރުގެ އައިޝާ
މި ދެމީހުން ރާއްޖެއަށް އެތެރެކުރި ހެރޮއިންގެ ބަރުދަނުގައި 2.05 ކިލޯ ހުރިކަމަށް ކަސްޓަމުން ބުނެއެވެ. އަދި މި ތަކެތީގެ މަގުމަތީ އަގަކީ2.5 މިލިއަން ދިވެހި ރުފިޔާއަށް އަރާނެކަމަށް ލަފާކުރެވޭކަމަށް ކަސްޓަމުން ބުނެއެވެ.
މިދިޔަ އަންގާރަ ދުވަހު ރާއްޖެ އައި މި ދެމަފިރިން ހައްޔަރުކޮށް ބަންދުގެ މުއްދަތު ޖެހުމަށް ގެންދިޔުމުން އެ ދެމީހުން ވެސް ތިން ދުވަހަށް ކަސްޓޯޑިއަލް ޖަލެއްގައި ބަންދުކުރުމަށް ކޯޓުން ވަނީ އަމުރުކޮށްފައެވެ.
އަމުރުގައިވާ ގޮތުން ބަންދަށް ކުރު މުއްދަތެއް ދީފައި ވަނީ އެ ދެމީހުންނަށް ހިންދީ ބަސް އެނގޭ ތަރުޖަމާނަކު ހަމަޖެހިފައި ނުވުމުންނެވެ. ނަމަވެސް، އިންވެސްޓިގޭޝަން އޮފިސަރަށް ހިންދީ ބަސް އެނގޭތީ، ބަންދު މަޖިލީހުގައި ހިނގައި ދިޔަ ކަންތައްތައް އެ ދެމަފިރިންނަށް ތަރުޖަމާކޮށްދީފައިވަނީ އޭނާ މެދުވެރިކޮށެވެ.
