މި އަމުރު ނެރުނީ ފިޝަރީޒް މިނިސްޓްރީން އެ ބޯޓުގެ މައްސަލަ ކޯޓަށް ހުށަހެޅުމުން ނެވެ.
"ޕުޝްޕާ ކުމަރަ" ނަމަކަށް ކިޔާ މި ބޯޓު ރާއްޖޭގެ ކަނޑުގެ ސަރަހައްދުގައި ގަވާއިދާ ހިލާފަށް މަސްވެރިކަން ކުރި ކަމަށް ތުހުމަތު ކުރެވުނެވެ. އެހެންކަމުން ފިޝަރީޒް މިނިސްޓްރީން ވަނީ އެ ބޯޓުގެ ވެރިފަރާތް ކަމަށްވާ ތަމަންތާ ރުކުމަލް ޕެރޭރާ 400،000 ރުފިޔާއިން ޖޫރިމަނާ ކޮށްފަ އެވެ. ނަމަވެސް މިނިސްޓްރީގެ އެންގުމާ އެއްގޮތަށް ޖޫރިމަނާ ފައިސާ ނުދެއްކުމުން އެ މައްސަލަ ސިވިލް ކޯޓަށް ހުށަހެޅުނެވެ.
ސިވިލް ކޯޓުން ނިންމީ ޕެރޭރާގެ މައްޗަށް ކުރެވުނު ޖޫރިމަނާއަކީ ސާބިތު ދަރަންޏެއް ކަމަށެވެ. އަދި މި މަހުގެ 15 ވަނަ ދުވަހުން ފެށިގެން 30 ދުވަހުގެ ތެރޭގައި ޖޫރިމަނާ ފައިސާ ދެއްކުމަށް އަންގައިފި އެވެ. މީގެ އިތުރުން "ޕުޝްޕާ ކުމަރަ" ބޯޓު ދައުލަތަށް ނެގުމަށްވެސް ކޯޓުން އަމުރުކޮށްފިއެވެ.
ރާއްޖޭގެ ކަނޑުގެ ސަރަހައްދުން ވަގަށް މަސްވެރިކަން ކުރާ ބޯޓުފަހަރު އަތުލައިގަތުމަކީ އާންމު ކަމެކެވެ. މިގޮތުން 2023 ވަނަ އަހަރުގެ އޮކްޓޯބަރު މަހު ވެސް ލަންކާގެ ފަސް ބޯޓެއް އަތުލައިގަނެފައިވާ ކަމަށް މައުލޫމާތު ލިބެ އެވެ. މިފަދަ ހާދިސާތައް ތަކުރާރުވުމާ ގުޅިގެން ރާއްޖޭގެ ކަނޑުގެ ސަރަހައްދު ބެލެހެއްޓުމަށް އިތުރު ފިޔަވަޅުތަކެއް އަޅަން ޖެހިފައިވާ ކަމަށް ބެލެވެއެވެ.
