މެޓުން ނެރުނު ރިޕޯޓެއްގައި ބުނެފައިވަނީ ފާއިތުވި 24 ގަޑިއިރުގެ ތެރޭގައި އުތުރުގެ ބައެއް ރަށްތަކަށް ވާރޭވެހުނު ނަމަވެސް ދެކުނުގެ އަތޮޅުތަކުގެ މޫސުން ވަނީ ރަނގަޅުވެފައިކަމަށެވެ.
މެޓުން ހާމަކުރި މައުލޫމާތުގައިވާ ގޮތުން، އެންމެ ބޯކޮށް ވާރޭވެހުނީ ށ. ފުނަދޫއަށެވެ. އެ ރަށަށް 22.1 މިލިމީޓަރުގެ ވާރޭ ވެހުނެވެ. އަދި ދެވަނައަށް އެންމެ ބޯކޮށް ވާރޭވެހުނީ ރ. އިފުރަށް ކަމަށާއި، އެ ރަށަށް 12 މިލިމީޓަރުގެ ވާރޭ ވެހުނު ކަމަށް މެޓުން ބުންޏެވެ. މީގެ އިތުރުން ށ. ކޮމަންޑޫ، ހދ. ހަނިމާދޫ، ހދ. ކުޅުދުއްފުށި، ރ. އަލިފުށި އަދި ބ. ދަރަވަންދޫއަށްވެސް ވާރޭވެހުނު ކަމަށް މެޓުން ހާމަކުރި އެވެ.
މިއަދުގެ މޫސުމަށް ބަލާއިރު، ރާއްޖޭގެ ގިނަ ސަރަހައްދުތަކަށް މޫސުން ރަނގަޅުވާނެ ކަމަށް މެޓުން ލަފާކުރެ އެވެ. ނަމަވެސް ހުޅަނގާއި ހުޅަނގު އުތުރުން ދެކުނުގެ އަތޮޅުތަކަށް ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، އެހެން އަތޮޅުތަކަށް ގަޑިއަކު 5 މޭލާއި 15 މޭލަށް ވައިޖެހޭނެ ކަމަށް މެޓުން ބުންޏެވެ. އަދި ދެކުނުގެ ކަނޑުތައް އާދައިގެ ވަރަކަށް ގަދަވާނެ ކަމަށާއި، ރާޅުގެ އުސްމިން 2 ފޫޓާއި 5 ފޫޓާ ދެމެދުގައި ހުންނާނެ ކަމަށްވެސް މެޓުން ލަފާކުރެއެވެ.
