މި ޖަލްސާ ބޭއްވުމަށް ހަމަޖެހިފައިވަނީ މި މަހުގެ 30 ވަނަ ދުވަހުގެ މެންދުރުފަހު 2:30 ގައި އެވެ.
ބީއެމްއެލުން ބުނީ މި ޖަލްސާ ބާއްވާނީ މޯލްޑިވްސް ސެކިއުރިޓީ ޑިޕޮޒިޓަރީގެ އޮންލައިން މީޓިންގ މެނޭޖްމަންޓް ސިސްޓަމް "ފަހިވޯޓް" މެދުވެރިކޮށް ކަމަށެވެ. އަދި މި ޖަލްސާގައި ބައިވެރިވެވޭނީ މި މަހުގެ 28 ވަނަ ދުވަހުގެ މެންދުރުފަހު 2:30 ގެ ކުރިން ބޭންކުގެ ހިއްސާދާރުންގެ ދަފްތަރުގައި ރަޖިސްޓަރީވެފައިވާ ހިއްސާދާރުންނަށް ކަމަށް ވެސް އެ ބޭންކުން ބުންޏެވެ.
މުހައްމަދު ޝަރީފަކީ ބީއެމްއެލްގެ ފުރަތަމަ ދިވެހި ސީއީއޯ އެވެ. އޭނާ އަކީ މާލީ ދާއިރާގައި 25 އަހަރަށް ވުރެ ގިނަ ދުވަހުގެ ތަޖުރިބާ ލިބިފައިވާ ބޭފުޅެކެވެ. މީގެ ތެރޭގައި އެގްޒެކެޓިވް އަދި ބޯޑު ލެވެލްގައި 7 އަހަރަށް ވުރެ ގިނަ ދުވަހުގެ ތަޖުރިބާ ހިމެނެ އެވެ. ޝަރީފް ވަނީ އިނގިރޭސި ވިލާތުގެ ޔުނިވަސިޓީ އޮފް މެންޗެސްޓަރ އިން އެމްބީއޭ ހާސިލުކުރައްވާފައެވެ.
ބީއެމްއެލްގެ ހިންގާ ގަވާއިދުގެ 47 ވަނަ މާއްދާގައިވާ ގޮތުން، ޑިރެކްޓަރުންގެ ބޯޑުގައި ހިމެނޭ 11 މެންބަރުންގެ ތެރެއިން މަދުވެގެން 8 ޑިރެކްޓަރުންނަކީ ސަރުކާރުގެ ފަރާތުން ބޯޑަށް އައްޔަންކުރާ ޑިރެކްޓަރުން ކަމަށް ވާންޖެހެ އެވެ. އަދި އަނެއް 3 މެންބަރުންނަކީ އާންމު ހިއްސާދާރުންގެ ފަރާތުން ބޯޑަށް އައްޔަންކުރާ މެންބަރުންނެވެ. މިހާރު ސަރުކާރުން ވަނީ ހުސްވެފައިވާ 2 މަގާމުގެ ތެރެއިން އެއް މަގާމަށް މުހައްމަދު ޝަރީފް އައްޔަންކުރުމަށް ހުށަހަޅާފަ އެވެ.
