މި ހާދިސާއާ ގުޅިގެން މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ގެ އޮފިސަރުން މިހާރު ވަނީ އެ ސަރަހައްދުގައި ހަރަކާތްތެރިވާން ފަށާފައެވެ.
އެމްއެންޑީއެފްއިން ބުނީ މި ހާދިސާއާ ގުޅޭ މައުލޫމާތު ލިބުނީ މިއަދު މެންދުރު 12:04 ހާއިރު ކަމަށެވެ. އަދި މިހާރު އެތަނުގައި ހަރަކާތްތެރިވަމުން ދަނީ އެމްއެންޑީއެފް މާލެ އޭރިއާ ކޮމާންޑާއި ތިލަފުށީ ފަޔާ ސްޓޭޝަނުގެ އޮފިސަރުން ކަމަށް އެ ފަރާތުން މައުލޫމާތުދިނެވެ.
އަލިފާނުގެ ހާދިސާ ހިނގާފައިވަނީ ވެމްކޯ ސައިޓުގައި ހުރި ކުނިތަކުގައި ކަމަށް ވުމާއެކު، އެ ސަރަހައްދުގައި ވަރަށް ބޮޑަށް ދުން ފެތުރިފައިވާ ކަމަށް ވެސް އެމްއެންޑީއެފް އިން ބުންޏެވެ. އަދި މި ވަގުތު އަލިފާން ނިއްވުމުގެ މަސައްކަތް ކުރިއަށްދާ ކަމަށާއި، އިތުރު މައުލޫމާތު ލިބުމުން ހިއްސާ ކުރާނެ ކަމަށް ވެސް ސިފައިން ބުންޏެވެ.
މި ހާދިސާއާ ގުޅިގެން އެއްވެސް މީހަކަށް އަނިޔާވެފައިވާކަން އަދި އެނގިފައެއް ނުވެއެވެ. އަދި އަލިފާނުގެ ސަބަބުން ލިބުނު ގެއްލުމުގެ މިންވަރު ވެސް މި ވަގުތު ސާފުވެފައެއް ނުވެ އެވެ. ވެމްކޯގެ ފަރާތުން މި ހާދިސާއާ ގުޅޭ ގޮތުން އަދި އެއްވެސް ބަޔާނެއް ނެރެފައެއް ނުވެއެވެ.
