ރޭސް ބާއްވާ ދުވަހު ފަތިހު 5:00 އިން ހެނދުނު 9:00 އަށް އަދި ހަވީރު 4:00 އިން 6:00 އަށް ރޭސް ރޫޓުގައި އާންމު އުޅަނދުފަހަރު ދުއްވުން މަނާވާނެއެވެ. ނަމަވެސް މި ވަގުތުތަކުގައި ޒަރޫރީ އުޅަނދުތަކާއި އިވެންޓަށް ހުއްދަ ދީފައިވާ އުޅަނދުތަކަށް ދަތުރުކުރެވޭނެ ކަމަށް އެ މިނިސްޓްރީން މައުލޫމާތުދިނެވެ.
ޑީއެމްއާރްއާރް އަކީ ރާއްޖޭގައި ބާއްވާ އެންމެ ބޮޑު ދުވުމުގެ މުބާރާތެވެ. މި އަހަރުގެ މުބާރާތުގައި 4،400 ދުވުންތެރިން ބައިވެރިވާނެ ކަމަށް ބެލެވެއެވެ. މި މުބާރާތުގައި ހާފް މެރަތަން އަދި 10 ކިލޯމީޓަރުގެ ރޭސް ހެނދުނު ބާއްވާއިރު، ފަސް ކިލޯމީޓަރުގެ ރޭސް ބާއްވާނީ ހަވީރު 4:30 ގައެވެ.
މި މުބާރާތަކީ ބައިނަލްއަގުވާމީ މިންގަނޑުތަކަށް ފެތޭ މުބާރާތެއް ކަމަށާއި، ވޯލްޑް އެތްލެޓިކްސްއިން ސެޓިފައި ކޮށްފައިވާ ރޭސް ރޫޓެއްގައި ބާއްވާ މުބާރާތެއް ކަމަށް ވެސް އިވެންޓް އޮގަނައިޒަރުން ބުނެފައިވެއެވެ. އަދި މިއީ އެސޯސިއޭޝަން އޮފް އިންޓަނޭޝަނަލް މެރަތަންސް އެންޑް ޑިސްޓަންސް ރޭސަސް (އެއިމްސް) ވޯލްޑް ރަނިން ކަލަންޑަރުގައި ހިމެނޭ ރާއްޖޭގެ ހަމައެކަނި މުބާރާތެވެ.
