މިއަދު ބޭއްވި މަޖިލީހުގެ ޖަލްސާގައި މި ބިލް ބަލައިގަތީ 71 މެންބަރުންގެ ތެރެއިން 65 މެންބަރުންގެ ވޯޓުންނެވެ. ބިލް ބަލައި ނުގަތުމަށް ވޯޓު ދިނީ އެމްޑީޕީގެ ތިން މެންބަރުންނެވެ.
މި ބިލުގައި ހިމެނެނީ ދުންފަތުގެ އުފެއްދުންތަކުން ނަގާ އިމްޕޯޓް ޑިއުޓީގެ މިންވަރު އިތުރުކުރުމާއި، ވޭޕް އެތެރެކުރުން މަނާކުރާ ތާރީހާ ހަމައަށް އެ ބާވަތްތަކުން ނަގާ ޑިއުޓީ ބޮޑުކުރުމެވެ. އިލެކްޓްރޯނިކް ސިނގިރޭޓާއި ވޭޕްކުރުމަށް ބޭނުންކުރާ އާލާތްތަކުން ނަގާ ޑިއުޓީގެ މިންވަރު 200 ޕަސަންޓަށް ބޮޑުކުރުމަށް ވަނީ ހުށަހަޅާފަ އެވެ.
ސިނގިރޭޓާއި ބިޑީގެ ޑިއުޓީ 50 ޕަސަންޓަށް ބޮޑުކުރުމަށް ހުށަހަޅާފައިވާއިރު، އެއީ ސިނގިރޭޓު އަދި ބިޑިއަކުން އަށް ރުފިޔާއަށް ބޮޑުކުރުމަށެވެ. މީގެ އިތުރުން ހީޓަޑް ޓޮބޭކޯ ޕްރޮޑަކްޓުތަކުގެ ޑިއުޓީ ވެސް 50 ޕަސަންޓަށް ބޮޑުކުރުމަށް ހުށަހަޅާފައިވެ އެވެ.
ރައީސް މުހައްމަދު މުއިއްޒު ވަނީ ވޭޕްކުރުމަށް ބޭނުންކުރާ ތަކެތި ރާއްޖެއަށް އެތެރުކުރުން 15 ނޮވެމްބަރު 2024 އިން ފެށިގެން މަނާކުރުމަށް ނިންމަވާފަ އެވެ. އަދި ދުންފަތުގެ އުފެއްދުންތަކުގެ ވިޔަފާރީގެ މުއާމަލާތްކުރެވޭ އެންމެ ހަގު އުމުރަކީ 21 އަހަރު ކަމަށް ކަނޑައެޅުމަށް ގާނޫނަށް އިސްލާހު ގެނައުމަށް ވެސް ނިންމަވާފައިވެ އެވެ.
