ހިޔާގެ 13 ނަންބަރު ޓަވަރުގައި ހިނގި މި ހާދިސާއާ ގުޅިގެން ހައްޔަރުކޮށްފައިވަނީ ހ. އެހަޑަ، އުމުރުން 28 އަހަރުގެ މުހައްމަދު އިސްމާއީލްއެވެ. ފުލުހުން ބުނީ އެ ރިޕޯޓް ލިބިގެން ފުލުހުންގެ ޓީމް އެ ސީނަށް ދިޔައިރުވެސް އަންހެން މީހާ ރޯ އަޑު އިވޭކަމަށެވެ. އެ އަޑު އިވޭ އެޕާޓްމެންޓްގެ ދޮރުގައި ޓަކިޖެހުމުން އަންހެނަކު ދޮރުހުޅުވިކަމަށާއި، އޭނާގެ ދަރިފުޅު އޭނާއަށް އަނިޔާކޮށް، ބިރުދައްކާ، ފޯނު ފޭރިގެން ގޮސްފައިވާކަމަށް އެ އަންހެން މީހާ ބުނިކަމަށް ފުލުހުން ބުނެއެވެ. އަދި މި އަންހެން މީހާއަށް ހޮސްޕިޓަލުގައި ފަރުވާދިންކަމަށްވެސް ފުލުހުން ބުނެއެވެ.
މި މައްސަލާގައި ހ. އެހަޑަ، އުމުރުން 28 އަހަރުގެ މުހައްމަދު އިސްމާއީލް ފުރަތަމަ ހައްޔަރުކުރީ ކޯޓު އަމުރެއްގެ ދަށުންނެވެ. ފުލުހުން ބުނީ އެ މައްސަލަ މިހާރު ތަހުގީގުކުރަމުންދާ ކަމަށެވެ. އޭނާގެ ބަންދާ މެދު ގޮތެއް ނިންމަން ހުޅުމާލެ މެޖިސްޓްރޭޓް ކޯޓަށް ހާޒިރުކުރުމުން 10 ދުވަހަށް ބަންދުކުރަން އަންގާފައިވާ ކަމަށް ފުލުހުން ބުންޏެވެ.
