މި ފެސިލިޓީ ހަދަނީ ހުޅުމާލޭ ދެވަނަ ފިޔަވަހީގެ ފަރުކޮޅުފުށި ސަރަހައްދުގައެވެ.
މިނިސްޓްރީން ބުނީ މި ފެސިލިޓީގެ މަސައްކަތް މިހާރު ވަނީ ނިމިފައި ކަމަށާއި މިހާރު ކުރިއަށްދަނީ ހުޅުވުމަށް ވާންޖެހޭ އެންމެފަހުގެ ތައްޔާރީތައް ކަމަށެވެ. މި ފެސިލިޓީ ހެދުމަށް 5000 އަކަފޫޓުގެ ބިމެއް ހަމަޖައްސައި، އެ މަސައްކަތް ކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މާލެ ސިޓީ ކައުންސިލާ ހަވާލުކުރީ މި އަހަރުގެ ޖަނަވަރީ މަހުގެ 25 ވަނަ ދުވަހު އެވެ.
މި ފެސިލިޓީއަށް ވެޓެރިނޭރިއަނަކާއި ދެ ނަރުހުން ހޯދުމަށް މާލެ ސިޓީ ކައުންސިލުން ވަނީ އިއުލާން ކޮށްފަ އެވެ. ވެޓެރިނަރީ ޑޮކްޓަރުގެ މުސާރައަކީ 35،000 ރުފިޔާ އަދި ވެޓެރިނަރީ ނަރުހުންގެ އަސާސީ މުސާރައަކީ 8،130 ރުފިޔާ އެވެ. މީގެ އިތުރުން ސަރވިސް އެލަވަންސްގެ ގޮތުގައި މަސައްކަތްކުރާ ކޮންމެ ދުވަހަކަށް 100 ރުފިޔާ ދޭނެ ކަމަށް ކައުންސިލުން ބުނެފައިވެ އެވެ.
މި ފެސިލިޓީން ބުޅަލަށް އާންމު ޗެކަޕްތަކާއި، ފަރުވާތަކާއި، އަދި އޮޕަރޭޝަންތައް ކުރެވޭނެ އެވެ. އަދި ބުޅަލަށް ބޭސް ދިނުމާއި، ކާންދިނުމާއި، ބޭސްއެޅުމުގެ އިތުރުން އިންޖެކްޝަން ޖެހުމާއި، ލޭ ނެގުމާއި، ކުޑަކަމުދާ ތަކެތި ޓެސްޓްކުރުން ފަދަ ހިދުމަތްތައް ލިބޭނެ ކަމަށް ވެސް ކައުންސިލުން މައުލޫމާތު ދީފައިވެ އެވެ.
