މި ދިރާސާތަކުން ދައްކާ ގޮތުގައި ރީންދޫގައި އެކުލެވޭ ކަރކިއުމިން މާއްދާގެ ސަބަބުން ޑިޕްރެޝަންގެ އަލާމާތްތައް ކުޑަކުރުމަށް އެހީތެރިވެދެއެވެ./
އިންޑިއާ އާއި ޗައިނާގައި ގަރުނުތަކެއް ވަންދެން ރީންދޫ ބޭނުންކުރަމުން އައީ ހަމުގެ ބަލިތަކާއި، އިންފެކްޝަންތަކާއި އަދި ނަފްސާނީ ބަލިތަކަށް ފަރުވާ ހޯދުމަށެވެ. އެހެންނަމަވެސް މިހާރު ކުރެވޭ ދިރާސާތަކުން ދައްކާ ގޮތުގައި ރީންދޫގައި އެކުލެވޭ ކަރކިއުމިންގެ ސަބަބުން ހަށިގަނޑުގެ އިމިއުން ސިސްޓަމްގައި އުފެދޭ އިންފްލަމޭޝަން ކުޑަކުރުމަށް އެހީތެރިވެދެ އެވެ. އަދި އިންފްލަމޭޝަން އާއި ޑިޕްރެޝަން ގުޅިފައިވާކަން ދިރާސާތަކުން ވަނީ ދައްކާފަ އެވެ.
ޖަނަވާރުން ބޭނުންކޮށްގެން ކުރެވުނު ދިރާސާތަކުން ދައްކާ ގޮތުގައި ރީންދުލުގައި ހުންނަ ކަރކިއުމިންގެ ސަބަބުން މޫޑު ކޮންޓްރޯލް ކުރާ ސެރެޓޮނިން އަދި ޑޮޕަމިން ފަދަ ކެމިކަލްތަކަށް އަސަރުކުރެ އެވެ. މީގެ އިތުރުން ސްޓްރެސްއަށް ރިއެކްޓްވާ ސެލްތަކަށް އަސަރުކުރާ ކަމަށާއި، ސެލްތަކުގެ އެނަރޖީ އުފައްދާ މައިޓޮކޮންޑްރިއާ ރައްކާތެރިކުރުމަށް އެހީތެރިވެދޭ ކަމަށް ވެސް ދިރާސާތަކުން ދައްކަ އެވެ.
ރީންދުލުގައި އެކުލެވެނީ 2 ޕަސަންޓާއިން 9 ޕަސަންޓާ ދެމެދުގެ ކަރކިއުމިން ކަމަށް ސައިންޓިސްޓުން ބުނެ އެވެ. އަދި ކަރކިއުމިންގެ ސަބަބުން އާތްރައިޓިސް އަދި އެކްނޭ ފަދަ ބަލިތަކަށް ވެސް ފަރުވާ ލިބިދާނެ ކަމަށް ދިރާސާތަކުން ދައްކާ ކަމަށް ވެސް އެ މީހުން ބުނެ އެވެ.
ނަމަވެސް ޑިޕްރެޝަންގެ ފަރުވާއަށް ރީންދޫ ބޭނުންކުރުމުގައި ބައެއް ކަންކަމަށް ސަމާލުވާން ޖެހެ އެވެ. ޑޮކްޓަރުން ބުނާ ގޮތުގައި ކާނާގައި ރީންދޫ ބޭނުންކުރުން ރައްކާތެރި ނަމަވެސް، ދިރާސާތަކުގައި ބޭނުންކުރާ މިންވަރަށް ކަރކިއުމިން ހޯދުމަށް ސަޕްލިމަންޓް ބޭނުންކުރަން ޖެހެ އެވެ. އަދި ސަޕްލިމަންޓް ބޭނުންކުރުމުގެ ކުރިން ޑޮކްޓަރެއްގެ ލަފާ ހޯދުމަށް އިރުޝާދުދެ އެވެ.
ރީންދޫ ސަޕްލިމަންޓް ބޭނުންކުރުމުގައި ދިމާވެދާނެ އަރާގުޅުންތަކުގެ ތެރޭގައި ހަމުގައި ބިހިނެގުމާއި، ބަނޑުގައި ރިހުން ހިމެނެ އެވެ. އަދި ލޭ ތުނިކުރާ ބޭސް ބޭނުންކުރާ މީހުން ރީންދޫ ބޭނުންކުރުމުން ލޭ އިތުރަށް ދިޔާވުމުގެ ފުރުސަތު އިތުރުވެދާނެ ކަމަށް ޑޮކްޓަރުން އިންޒާރުދެ އެވެ.
ޑިޕްރެޝަންގެ ފަރުވާއަށް ރީންދޫ ބޭނުންކުރުމުގެ ދިގު މުއްދަތުގެ ނަތީޖާ ދެނެގަތުމަށް އިތުރު ދިރާސާތަކެއް ކުރަން ޖެހޭ ކަމަށް ސައިންޓިސްޓުން ބުނެ އެވެ. އަދި މިހާރު ބޭނުންކުރާ ޑިޕްރެޝަންގެ ބޭސްތަކުގެ ބަދަލުގައި ރީންދޫ ބޭނުންކުރުމަކީ އަދި އެންމެ ރަނގަޅު ގޮތް ނޫން ކަމަށް ވެސް އެ މީހުން ލަފާދެ އެވެ.
