މަޖިލިސް ރައީސް އަބްދުއްރަހީމް އަބްދުﷲ ވިދާޅުވި ގޮތުގައި ރައީސް މުހައްމަދު މުއިއްޒު ވެރިކަމަށް އައި އިރު ޕީއެންސީގައި ތިބީ 3،022 މެންބަރުންނެވެ. ނަމަވެސް އެއް އަހަރު ނުވަނީސް އެ އަދަދު ވަނީ ބޮޑުތަނުން އިތުރުވެފަ އެވެ.
ޕީއެންސީގެ ޗެއަޕާސަން އަބްދުއްރަހީމް ވިދާޅުވި ގޮތުގައި ކޮންމެ ރެއަކު ގާތްގަނޑަކަށް 100 މީހުން ޕާޓީއަށް ވަދެ އެވެ. އަދި އެއީ މަޖުބޫރުން ފުރުވާ ފޯމުތަކެއް ނޫނެވެ.
އިދިކޮޅު އެމްޑީޕީން ބުނަމުންދަނީ ޕީއެންސީން ސަރުކާރު އޮފީސްތަކާއި ކުންފުނިތަކުން މަޖުބޫރުން ފޯމު ފުރުވާ ކަމަށެވެ. ނަމަވެސް އެއީ ތެދެއް ނޫން ކަމަށް އަބްދުއްރަހީމް ވަނީ ވިދާޅުވެފަ އެވެ. އަދި ޕީއެންސީގެ ލީޑަޝިޕްގައި ތިބީ ރާއްޖޭގައި ޕާޓީ ހަދަން އެންމެ ފަރިތަ މީހުން ކަމަށް ވެސް އޭނާ ވިދާޅުވި އެވެ.
މިދިޔަ ހުކުރު ދުވަހު ޕީއެންސީން ވަނީ އެ ޕާޓީއަށް 65،000 މެންރުން ހަމަވުމުން އެކަމުގެ އުފާ ފާޅުކޮށްފައެވެ. އަދި އެ ޕާޓީގެ އަމާޒަކީ ކުރިއަށް އޮތް ތަނުގައި 70،000 އިން މައްޗަށް ޕާޓީގެ މެންބަރުންގެ އަދަދު އެރުވުންކަމަށް އެ ޕާޓީގެ އިސްވެރިން ވަނީ ވިދާޅުވެފައެވެ.
