މިގޮތަށް ނިންމީ ކުރިން އެކުލަވައިލި ދާއިމީ ލިސްޓަކީ ރަނގަޅު ލިސްޓެއް ނޫން ކަމަށް ދެ ކޮމިޓީއަކުން ފާހަގަކުރުމާ ގުޅިގެންނެވެ.
ހައުސިން މިނިސްޓްރީން މިއަދު ނެރުނު ބަޔާނެއްގައި ބުނީ ރައީސް މުހައްމަދު މުއިއްޒުގެ ލަފާގެ ދަށުން އެކުލަވައިލި ހައުސިން އެޑްވައިޒަރީ ކޮމިޓީ އާއި މާލެ ސިޓީ ކައުންސިލުން އެކުލަވައިލި ހައުސިން ކޮންސަލްޓެޓިވް ކޮމިޓީން ވަނީ މި ކަން ފާހަގަކޮށްފައިވާކަމަށެވެ.
މި ސްކީމަށް 15،000 އަށް ވުރެ ގިނަ ފަރާތުން ވަނީ ފޯމު ހުށަހަޅައިފަ އެވެ. އޭގެ ތެރެއިން 9،000 މީހުން ފުލެޓަށް ޝަރުތު ފުރިހަމަވާ ކަމަށް އެމްޑީޕީ ސަރުކާރުން ނިންމި އެވެ. އަދި ފަހި ދިރިއުޅުން ކޯޕަރޭޝަނުން އަޅަމުންދާ 4،000 ފުލެޓުގެ ހައްގުވެރިންގެ ލިސްޓެއް އެ ސަރުކާރުން އާންމުކުރި އެވެ.
އެހެން ނަމަވެސް އެ ލިސްޓުގައި ގިނަ މައްސަލަތަކެއް ހުރި ކަމަށް އޭސީސީން ފާހަގަކުރުމާ ގުޅިގެން ފުލެޓު ދޫކުރުން ވަނީ މެދުކެނޑިފަ އެވެ. އަދި މިހާރު އަލުން ހުރިހާ ފޯމެއް ބަލަން ފެށުމާ ގުޅިގެން އެކަމަށް އިތުރު ވަގުތު ނަގާނެ ކަމަށް ހައުސިން މިނިސްޓްރީން ބުނެފައިވެ އެވެ. މިގޮތުން މިމަހު އާ ލިސްޓު ނެރޭނެކަމަށް ކުރިން ބުނި ނަމަވެސް، މިހާރު ފްލެޓް ލިސްޓު ނެރޭނެކަމަށް ބަލަނީ އަންނަ ނޮވެމްބަރު މަހުގެ ތެރޭގައެވެ.
