ސަމީރު އިސްތިއުފާ ދެއްވި ކަން އަންގަވާފައިވަނީ އިއްޔެ އެވެ. އެގޮތުން އިއްޔެއަކީ ޕީޖީ އޮފީހުގައި އޭނާގެ އެންމެ ފަހު ދުވަސް ކަމަށް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވި އެވެ. އަދި އެކުގައި މަސައްކަތް ކުރެއްވި އެންމެންނަށް ޝުކުރު އަދާކުރައްވާފައި ވެއެވެ.
ސަމީރު އިސްތިއުފާ ދެއްވުމާ ގުޅިގެން މިހާރު ޕީޖީ އޮފީހުގައި ހުންނެވީ އެންމެ ޑެޕިއުޓީ ޕްރޮސެކިއުޓާ ޖެނެރަލެކެވެ. އެއީ މަހުމޫދު ސަލީމް އެވެ. ޑެޕިއުޓީ ޕީޖީގެ މަގާމަށް މީހުން އައްޔަންކޮށް، ވަކިކުރުމުގެ ބާރު ލިބިގެންވަނީ ޕްރޮސެކިއުޓާ ޖެނެރަލަށެވެ.
ސަމީރަކީ ހައި ކޯޓުގެ ފަނޑިޔާރު ކަމުގައި 10 އަހަރަށް ވުރެ ގިނަ ދުވަހު ހުންނެވި ބޭފުޅެކެވެ. އަދި އޭގެ ކުރިން ސިވިލް ކޯޓުގެ އިސް ގާޒީ ކަން ވެސް ކުރައްވާފައިވެ އެވެ. ޑެޕިއުޓީ ޕީޖީގެ މަގާމަށް ސަމީރު އައްޔަން ކުރެއްވީ މިދިޔަ އަހަރުގެ މެއި މަހު އެވެ.
މިސްރުގެ އަޒްހަރު ޔުނިވަސިޓީންނާއި މެލޭޝިއާއިން ގާނޫނީ ދާއިރާއިން މަތީ ތައުލީމު ހާސިލުކުރައްވާފައިވާ ސަމީރަކީ ހައި ކޯޓުގައި މަޝްހޫރު ބޮޑެތި މައްސަލަތަކެއް ނިންމެވި ބޭފުޅެކެވެ. އޭގެ ތެރޭގައި އަނބިމީހާ ފިރިމީހާ ރޭޕްކުރުމުގެ ކުށެއް ފުރަތަމަ ފަހަރަށް ސާބިތުވާ ކަމަށް 2020 ވަނަ އަހަރު ނިންމެވި މައްސަލަ ހިމެނެ އެވެ.
