މި ބިލަށް މަޖިލީހުގެ 77 މެންބަރުން ވަނީ ތާއީދުކޮށްފަ އެވެ.
ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ ހެންވޭރު އުތުރު ދާއިރާގެ މެންބަރު އަހުމަދު އައިފާން އެވެ. މި ބިލުގެ މައިގަނޑު މަގުސަދަކީ އިލެކްޓްރޯނިކް ސިނގިރޭޓާއި ވޭޕް ރާއްޖެއަށް އެތެރެކުރުމާއި، ވިއްކުމާއި، ހިލޭ ދިނުމާއި، ބޭނުންކުރުން މަނާކުރުން ކަމަށް އައިފާން ވިދާޅުވި އެވެ.
މި ބިލު ފާސްވެއްޖެ ނަމަ، ވޭޕާއި އީ-ސިނގިރޭޓްގެ ބާވަތްތައް ރާއްޖެއަށް އެތެރެކުރުން މަނާވެގެންދާނެ އެވެ. އަދި 21 އަހަރުން ދަށުގެ މީހުންނަށް ސިނގިރޭޓް ވިއްކުން ވެސް މަނާވެގެންދާނެ އެވެ. މީގެ އިތުރުން، ގާނޫނާ ހިލާފުވާ ފަރާތްތަކާ މެދު އަޅާ ފިޔަވަޅުތައް ވެސް ހަރުކަށިކުރެވިގެންދާނެ އެވެ.
މި ބިލަކީ ދުންފަތް ކޮންޓްރޯލްކުރުމާ ބެހޭ ގާނޫނަށް ގެންނަ އިސްލާހެކެވެ. މި އިސްލާހުގެ ސަބަބުން ގާނޫނު ތަންފީޒުކުރުމުގައި ދިމާވާ ދަތިތައް ހައްލުކުރެވިގެންދާނެ ކަމަށް މަޖިލީހުގެ މެންބަރުން ބުނެ އެވެ.
