މައުރޫފް މި ވާހަކަ ދެއްކެވީ ރައްޔިތުންގެ މަޖިލީހުގައި ދުންފަތް ކޮންޓްރޯލް ކުރުމުގެ ބިލަށް ހުށަހެޅުނު އިސްލާހަކާ ގުޅިގެން ވާހަކަދައްކަވަމުންނެވެ. އެމްޑީޕީން އެއްވެސް ތަނެއްގައި ވޭޕާއި ސިނގިރޭޓް އާންމުކުރުމަށް ގޮވާލާފައި ނުވާނެ ކަމަށް އޭނާ ވިދާޅުވި އެވެ.
އެހެން ނަމަވެސް ސަރުކާރުން މިހާރު އަމަލުކުރަމުންދާ ގޮތުން އެކަމުގައި އިހުލާސްތެރިކަމެއް ނެތް ކަމަށް އޭނާ ވިދާޅުވި އެވެ.
މައުރޫފް ވިދާޅުވީ އަމިއްލަ ނަފްސު ކޮންޓްރޯލްކުރުމާއި، ހޭލުންތެރިކުރުމަށް އާންމުންނަށް މައުލޫމާތު ފޯރުކޮށް ނުދީ ސިނގިރޭޓާއި ދުންފަތުގެ އެހެން ބާވަތްތައް ނުހުއްޓުވޭނެ ކަމަށެވެ. އަދި ޓޮބޭކޯ މަނާކުރުމުގެ ނަމުގައި ޑިއުޓީ ބޮޑުކުރުމަކުން ހައްލެއް ނުލިބޭނެ ކަމަށް ވެސް އޭނާ ވިދާޅުވި އެވެ.
ރައީސް މުހައްމަދު މުއިއްޒު ވަނީ ވޭޕް ބޭނުންކުރުމާއި، އެތެރެކުރުމާއި ވިޔަފާރިކުރުން މަނާކުރަން ނިންމަވާފަ އެވެ. އެކަން އިއުލާންކުރެއްވީ އޮކްޓޯބަރު މަހު އެވެ. ރައީސް މި ނިންމެވުން ނިންމެވީ ވޭޕް މަނާކުރުމަށް ޖަމިއްޔާތަކުން ގޮވާލާފައިވާ ދަނޑިވަޅެއްގަ އެވެ.
