މާލެއާއި ވިލިމާލޭގެ ހުރިހާ މަގެއް ޗައިނާ ސަރުކާރުގެ އެހީގައި ހަދައިދޭން ނިންމާފައަިވާކަން ރައީސް ޑރ. މުހައްމަދު މުއިއްޒު އިއުލާން ކުރެއްވީ ރައްޔިތުން މަޖިލީހުގެ އިންތިހާބުގެ ކެމްޕެއިން ތެރޭގައެވެ. މި މަސައްކަތް ކޮށްދެނީ ޗައިނާ އިންޓަނޭޝަނަލް ޑިވެލޮޕްމަންޓް ކޯޕަރޭޝަން އެޖެންސީ (ސިޑްކާ)ގެ އެހީގައެވެ. މި މަޝްރޫއުގެ ފީސިބިލިޓި ސްޓަޑީ ހެދުމުގެ އެއްބަސްވުމުގައި މިދިޔަ ޖުލައި މަހުގެ 23ގައި ޗައިނާގައިވަނީ ސޮއިކޮށްފައެވެ.
މިއަހަރު ރައްޔިތުން މަޖިލިސް ހުޅުވާ ދެއްވަމުން ދެއްވި ރިޔާސީ ބަޔާނުގައި ރައީސް ޑރ މުއިއްޒު ވިދާޅުވީ މަގުތައް ހެދުމުގެ މަސައްކަތް މިއަހަރުގެ ތެރޭގައި ފެށޭނެކަމަށެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރު މުއްތަލިބް ވިދާޅުވީ މަހުތައް ހެދުމުގެ އަމަލީ މަސައްކަތް ފެށެނީ އަންނަ އަހަރުގެ މެދުތެތެރޭގައިކަމަށް ބެލެވޭކަމަށެވެ. ސަބަބެއްކަމަށް ވިދާޅުވީ މި ފަދަ މަޝްރޫއުތައް ހިންގުމުގައި ޗައިނާއިން އަަމަލުކުރާ އުސޫލުތަކެއް ހުރުންކަމަށް މިނިސްޓަރު މުއްތަލިބް ވިދާޅުވިއެވެ.
މިނިސްޓާރު ވިދާޅުވީ މަސައްކަތް ޓެންޑާކުރުމާއި ހަމައަށް ދާނީ ޗައިނާއިން ޓީމެއް އައިސް ފީޒިބިލިޓީ ސްޓަޑީޒް ހެދުމަށްފަހުކަމަށެވެ. މި މަސައްކަތް ކުރާ ޓީމު އަންނަ މަހުގެ ހަތަރުވަނަ ދުވަހު ރާއްޖެ އަންނާނެކަމަށާއި އެ މަސައްކަތުގައި 20 ދުވަސް ހޭދަކުރާނެކަމަށް މިނިސްޓަރު މުއްތަލިބް ވިދާޅުވިއެވެ.
މިނިސްޓަރު މުއްތަލިބް ވިދާޅުވީ އަމާޒަކީ މާލޭގެ މަގުތައް ހެދުމުގެ މަޝްރޫއުގެ މަސައްކަތް އެއްކަޮށް ހަތަރު ަހަރު ދުވަހުގެ ތެރޭގައި ނިންމުންކަމަށެވެ.
