މި އުސޫލުތަކަށް އަމަލުކުރަން ފަށާފައިވަނީ ހޯމަ ދުވަހުން ފެށިގެންނެވެ.
މީރާއިން ބުނީ މި ގަވާއިދަކީ އެސްއީޒެޑްތަކުގައި ހިންގޭ އިގްތިސާދީ ހަރަކާތްތަކުގެ ކުޑަބޮޑުމިން ދެނެގަތުމަށާއި، ގާނޫނުގެ ދަށުން ޒޯން ޑިވެލޮޕަރުންނާއި އިންވެސްޓަރުންނަށް ދެވޭ އިނާޔަތްތަކުގެ ޓެކްސް އެކްސްޕެންޑިޗަރ ހިސާބުކުރުމަށް ބޭނުންވާ މައުލޫމާތު ހޯދުމަށް އެކުލަވާލި ގަވާއިދެއް ކަމަށެވެ.
އާ ގަވާއިދުގެ ދަށުން ކޮންމެ އަހަރެއްގެ މާލީ ހިސާބުތައް ވިދިގެން އަންނަ އަހަރުގެ ޖޫން 30 ގެ ކުރިން މީރާއަށް ހުށަހަޅަން ޖެހޭނެ އެވެ. އަދި މި ހިސާބުތައް ތައްޔާރުކުރަން ޖެހޭނީ ކޮމިޝަނަރ ޖެނެރަލް ގަބޫލުކުރާ ބައިނަލްއަގުވާމީ މިންގަނޑުތަކާ އެއްގޮތަށް އެކްރޫއަލް ބޭސިސްއަށެވެ.
މީރާއިން އިތުރަށް ބުނީ ޒޯން ސުޕްރިންޓެންޑެންޓުން ވެސް އެ ޒޯނުގައި ހަރަކާތްތެރިވާ ޑިވެލޮޕަރުންނާއި އިންވެސްޓަރުންގެ މައުލޫމާތު ކޮންމެ ކުއާޓަރެއް ނިމޭތާ 15 ދުވަހުގެ ތެރޭގައި މީރާއަށް ހުށަހަޅަން ޖެހޭނެ ކަމަށެވެ. މީގެ ތެރޭގައި ހުއްދަ ބާތިލުކޮށްފައިވާ ފަރާތްތަކުގެ މައުލޫމާތު ވެސް ހިމެނެ އެވެ.
ހުށަހަޅަން ޖެހޭ ލިޔެކިޔުންތަކުގެ ތެރޭގައި އެސްއީޒެޑް ބަޔާނާއި، އާމްދަނީ އާއި ހަރަދުގެ ބަޔާނާއި، ބެލެންސް ޝީޓާއި، ފައިސާ ލިބުނު ގޮތާއި ހޭދަވި ގޮތުގެ ބަޔާނާއި، ހިއްސާގެ ރައުސްމާލަށް އައި ބަދަލުތަކުގެ ބަޔާނާއި، މާލީ ހިސާބުތަކާ ގުޅޭ ނޯޓްސްއާއި، ޑިރެކްޓަރުންގެ ރިޕޯޓާއި އޮޑިޓަރުގެ ރިޕޯޓު ހިމެނެ އެވެ.
