މާލިއްޔަތު ކޮމިޓީގެ މިއަދުގެ ބައްދަލުވުމުގައި މި މައްސަލަ ފުލުހުންނަށް ހުށަހެޅުމަށް ހުށަހެޅީ ދިއްގަރު ދާއިރާގެ މެންބަރު އަހުމަދު ނާޒިމެވެ. އެ ހުށަހެޅުމަށް ހިތަދޫ މެދު ދާއިރާގެ މެންބަރު އަހުމަދު އަޒާނާއި އޭދަފުށީ ދާއިރާގެ މެންބަރު އަހުމަދު ސަލީމް ވަނީ ތާއީދުކޮށްފަ އެވެ. މި މައްސަލަ ފުލުހުންނަށް ހުށަހެޅުމަށް ކޮމިޓީން ފާސްކޮށްފައިވަނީ ބައްދަލުވުމުގައި ބައިވެރިވި ހަތް މެންބަރުންގެ އަގުލަބިއްޔަތުންނެވެ.
އާސަންދައިގެ އާ އޮފީސް އިމާރާތް އެޅުމުގެ މަސައްކަތް ނޯތު ކޯސްޓް ކޮންސްޓްރަކްޝަނާ ހަވާލުކޮށްފައިވަނީ 147 މިލިއަން ރުފިޔާއަށެވެ. އަދި މި މަސައްކަތުގެ އެޑްވާންސްގެ ގޮތުގައި 2023 ވަނަ އަހަރު ދެ ފަހަރެއްގެ މަތިން 44 މިލިއަން ރުފިޔާ އެ ކުންފުންޏަށް ދީފައިވާއިރު، މިހާތަނަށް އެއްވެސް މަސައްކަތެއް ފަށާފައި ނުވާކަން ފާހަގަކުރެވެ އެވެ.
މީގެ ކުރިން 2016 ވަނަ އަހަރު އާސަންދައިގެ ހޮސްޕިޓަލެއް އެޅުމަށް 61 މިލިއަން ރުފިޔާއަށް އެ ކުންފުންޏާ މަސައްކަތް ހަވާލުކުރި ނަމަވެސް، އާސަންދައަށް ކުރިމަތިވި މާލީ ދަތިތަކާ ހެދި އެ މަސައްކަތް މަޑުޖައްސާލަން ޖެހުނެވެ. އޭގެ ފަހުން ނިމިދިޔަ ސަރުކާރުގައި ބަދަލު ދިނުމަށް އެކުލަވާލި ކޮމިޓީއަށް މައްސަލަ ހުށަހެޅުމުން، ރައީސް އޮފީހުން ވަނީ އާސަންދައިގެ އާ އޮފީސް އިމާރާތް އެޅުމުގެ މަސައްކަތް އަލުން އެ ކުންފުންޏާ ހަވާލުކުރަން ނިންމާފަ އެވެ.
ނޯތު ކޯސްޓް ކޮންސްޓްރަކްޝަންގެ ވެރިޔާ އަލީ ހަމީދަކީ ރައްޔިތުންގެ މަޖިލީހުގެ އިސްދޫ ދާއިރާގެ ކުރީގެ މެންބަރެކެވެ. އޭނާ ވަނީ ރިޔާސީ އިންތިހާބުގެ ކުރިން އެމްޑީޕީއާ ގުޅިފަ އެވެ
