ފަލަސްތީނާ ދެކޮޅަށް އިޒްރޭލުން ދެމުންދާ ހަމަލާތަކާ ގުޅިގެން، ރާއްޖޭގައި ހުންނަ ބައެއް އެމްބަސީތައް ކައިރީގައި އަޑުއުފުލި މައްސަލާގައި މިދިޔަ މަހު ހައްޔަރުކުރީ ދީނީ އިލްމުވެރިޔާ ޑރ. އިޔާޒްގެ އަނބިކަނބަލުން ޝާދިޔާ އާއި ޑރ. ޝަޒްރާ އިބްރާހިމެވެ.
ސައުދީ އެމްބަސީ ކައިރީ މުޒާހަރާކުރަނިކޮށް މި ދެމީހުން ހައްޔަރުކުރުމަށް ފަހު ދޫކޮށްލީ ބަންދުގައި ތިބޭތާ 9 ދުވަސް ފަހުންނެވެ. އެ މީހުން މިނިވަންވީ ބަންދުގެ މުއްދަތު އިތުރުކުރުމަށް ކޯޓަށް ގެންދިޔުމުން ކޯޓުން އެ މުއްދަތު ޖަހާ ނުދިނުމުންނެވެ.
ޕީޖީ އޮފީހުން ބުނީ ޝާދިޔާ އާއި ޑރ. ޝަޒްރާގެ މައްޗަށް ދައުވާކުރުމާއި މެދު މި ހަފްތާގައި ގޮތެއް ނިންމާނެކަަމަށެވެ. މި ދެ މީހުންނަށް ދައުވާ ކުރުމުގެ މުއްދަތު ހަމަވާނީ މި ހަފުތާގެ ނިޔަލަށް ކަމަށްވެސް ޕީޖީ އޮފީހުން ބުނެއެވެ.
ޝާދިޔާ އާއި ޑރ. ޝަޒްރާ ހައްޔަރުކުރީ ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ގާނޫނާ ހިލާފަށް، ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ، އަޑުގަދަކުރާ ބޭނުންކޮށްގެން ހަޅޭއްލެވުމާއި، ބޭއަދަބީ ބަހުރުވައިން މުއާމަލާތްކުރުމުގެ ސަބަބުން ކަމަށް ފުލުހުން ބުނެއެވެ.
މި ދެމީހުން ބަންދުކޮށް ކްރިމިނަލްކޯޓުން ވަނީ ދެ ފަހަރެއްގެ މަތިން ބަންދުގެ މުއްދަތު އިތުރުކޮށްދީފައެވެ. އެހެންނަމަވެސް މި ދެމީހުންގެ ފަރާތުން އެ މައްސަލަ ހައިކޯޓްގައި އިސްތިއުނާފުކުރުން އެ ކޯޓުން ނިންމި ނިންމުމުގައި ވަނީ އެމީހުންގެ ބަންދުގެ މުއްދަތު ދެ ފަހަރަށްވެސް ދަށު ކޯޓުން ޖެހީ ގާނޫނާއި ހިލާފަށް ކަމަށެވެ.
ހައިކޯޓްގެ މި ނިންމުން ދައުލަތުން ސުޕްރީމްކޯޓަށްވެސް ހުށައެޅިއެވެ. އެހެންނަމަވެސް އެ ކޯޓުން އެ މައްސަލަ ބަލައިގެންފައެއް ނުވެއެވެ.
