ހޯމްލޭންޑް މިނިސްޓަރު އަލީ އިހުސާން މަޖިލީހުގައި ވިދާޅުވި ގޮތުގައި، އިންދިރާ ޕްރޮޖެކްޓްސް އަށް ދީފައިވާ ފައިސާއިން އެއްވެސް މަސައްކަތެއް މިހާތަނަށް ކޮށްފައެއް ނުވެ އެވެ. އަދި އެ ފައިސާ ވީ ގޮތުގެ އެއްވެސް މައުލޫމާތެއް އެ ކުންފުނިން ދީފައެއް ނުވެ އެވެ.
ހިތަދޫ މެދު ދާއިރާގެ މެންބަރު އަހުމަދު އަޒާން ވިދާޅުވީ އެ ކުންފުނިން ވަނީ ކުރީގެ އިކޮނޮމިކް މިނިސްޓަރު ފައްޔާޒް އިސްމާއިލްގެ އާއިލާގެ ކުންފުންޏެއް ކަމަށްވާ "ބިގް" ގެ ހިއްސާ ގަނެފައި ކަމަށެވެ. އަދި އެ ފައިސާއިން މިހާރު ގަލޮޅުގައި އާއިލާގެ ބޭނުމަށް ގެއެއް އަޅަމުންދާ ކަމަށް މައުލޫމާތު ލިބިފައިވާ ކަމަށް އަޒާން ވިދާޅުވި އެވެ.
މި މަޝްރޫއަކީ 2019 ވަނަ އަހަރު އިންޑިއާގެ އެގްޒިމް ބޭންކުން 85 ޕަސަންޓު ފައިނޭންސް ކުރާ ގޮތަށް ހަމަޖެހުނު މަޝްރޫއެކެވެ. އަދި 15 ޕަސަންޓު ދިވެހި ސަރުކާރުން ހަމަޖައްސާ ގޮތަށް ނިންމި އެވެ.
މާލިއްޔަތު ކޮމިޓީގެ މެންބަރުން އިއްތިފާގުން ވަނީ މި މައްސަލަ ތަހުގީގު ކުރަން ނިންމައިފަ އެވެ. އަދި މި މައްސަލައިގައި ދައުލަތުގެ ފައިސާ އަމިއްލަ ބޭނުމަށް ނަގައިފައިވާ ކަމަށް ތުހުމަތު ކުރެވޭ ކަމަށް ކޮމިޓީން ބުނެފައިވެ އެވެ.
