ވަޒީރު ޝިޔާމް މިހެން ވިދާޅުވީ މަސްވެރިކަމުގެ ދާއިރާއާ ގުޅޭ ގޮތުން ރައްޔިތުން މަޖިލީހުގެ ބައެއް މެމްބަރުން ކުރިމަތިކުރި ސުވާލުތަކަށް ޖަވާބުދެއްވަމުންނެވެ.
ޝިޔާމް ވިދާޅުވީ މިހާރު ކެޕޭސިޓީ ހުރި ގޮތުން އެއްފަހަރާ ރައްކާކުރެވޭނީ 8 ހާސް ޓަނު މަސްކަމަށެވެ.250 މިލިއަން ރުފިޔާގެ މަސހުގެ ވާހަކަ ދައްކާއިރު އެވަރު ރައްކާކުރެވޭނެ ސްޓޯރޭޖެއް ނެތްކަން ފާހަގަކުރައްވަމުން ސިޔާމް ވިދާޅުވީ މި ސަރުކާރު ނިމޭއިރު ސްޓޯރޭޖެ ބޮޑުތަނުން ބޮޑުވާނެކަށެވެ.
ފެލިވަރުގެ ކޯލްޑް ސްޓޯރޭޖް 4،000 ޓަނަށް ބޮޑުކުރުމުގެ މަސައްކަތް ވަނީ ފަށާފައެވެ. މި މަސައްކަތް 23 މިލިއަން ޑޮލަރަށް އިންޑިއާގެ ކުންފުންޏަކާއި ހަވާލުކޮށް ފެށީ މިދިޔަ ވެރިކަމުގައެވެ. މި މަސައްކަތް އަވަސްކުރުމަށް އެ ކުންފުންޏާއި އެކު މި ސަރުކާރުން ވަނީ މަޝްވަރާކޮށްްފައެވެ.
އެ މަސައްކަތުގެ ދަށުން ދުވާލަކު 200 ޓަނުގެ މަސް ފްރީޒް ކުރެވޭ ބްރައިން ފްރީޒިން ފެސިލިޓީއަކައި މަސް ފިނިކޮށް ބަހައްޓާ 80 ޓަނުގެ ރެފްރިޖަރޭޓަޑް ސީ ވޯޓަ ސިސްޓަމެއް ގާއިމުކުރަން ވަނީ ހަމަޖެހިފަ އެވެ.
ފެލިވަރުގައި ތަރައްގީ ކުރާ އެ ކޯލްޑް ސްޓޯރޭޖަކީ މިހާތަނަށް ރާއްޖޭގައި ގާއިމުކުރެވޭނެ އެންމެ ބޮޑު ކޯލްޑް ސްޓޯރޭޖްކަމަށް މިފްކޯއިން ވަނީ ބުނެފަ އެވެ.
