މައްސަލަ ބާތިލުކުރި ސަބަބެއްގެ ގޮތުގައި ކޯޓުން ބުނީ، މައްސަލައިގެ އަޑުއެހުމަށް ޔާމީންގެ ފަރާތުން ހަމަޖެއްސެވި ވަކީލު ހާޒިރުނުވުމުންނެވެ. އަދި ހާޒިރުނުވި ސަބަބު އަންގައިދޭ އެއްވެސް ލިޔުމެއް ކޯޓަށް ހުށަހަޅާފައި ނުވާ ކަމަށް ވެސް ކޯޓުން ބުންޏެވެ.
ޔާމީންގެ ފަރާތުން މި މައްސަލަ ކޯޓަށް ހުށަހެޅުއްވީ 2022 ވަނަ އަހަރުގެ ސެޕްޓެމްބަރު 20 ވަނަ ދުވަހު އެވެ. އޭރުގެ ރައީސް އިބްރާހިމް މުހައްމަދު ސޯލިހު ނެރުއްވި ގަރާރަކީ ގާނޫނު އަސާސީގެ ތިން މާއްދާއަކާ ހިލާފަށް ނެރުއްވި ގަރާރެއް ކަމަށް ބުނެ އެވެ.
މައްސަލަ ބާތިލުކުރި އަޑުއެހުން ބޭއްވީ މި އަހަރުގެ އޮކްޓޯބަރު 29 ވަނަ ދުވަހު އެވެ. އެ އަޑުއެހުމަށް ހާޒިރުވުމުގެ އަމުރު ވަކީލަށް ރައްދުކުރެވުނީ އެ ތާރީހުގެ ދެ ދުވަސް ކުރިން ކަމަށް ކޯޓުގެ ހުކުމުގައި ވެ އެވެ.
ސިވިލް ކޯޓުގެ ގަވާއިދުގައި ވާ ގޮތުން، ދައުވާކުރާ ފަރާތުން އެކަށީގެންވާ ސަބަބެއް ނެތި ކޯޓަށް ހާޒިރުނުވެއްޖެ ނަމަ، އެ މައްސަލައެއް ބާތިލުކުރުމުގެ އިހުތިޔާރު ކޯޓަށް ލިބިގެންވެ އެވެ.
