ތިމާވެށި މިނިސްޓްރީން ބުނީ މި ފަންޑަކީ ރާއްޖެ ފަދަ ކުދި ޖަޒީރާ ގައުމުތަކަށް ދިރޭތަކެތީގެ ނަސްލުތަކާއި މާހައުލުތައް ހިމާޔަތް ކުރުމަށް ބޭނުންވާ ފައިސާގެ އެހީ އަދި ވަސީލަތްތައް ހޯދުމަށް މަގުފަހިވެގެންދާނެ ކަމެއް ކަމަށެވެ.
ކޮންފަރެންސްގައި ތިމާވެށި މިނިސްޓަރު ތޯރިގް އިބްރާހިމް ވަނީ ތިމާވެށީގެ ދާއިރާއިން ރާއްޖެއަށް އެހީތެރިވާ ގައުމުތަކާއި ފަރާތްތަކާ ބައްދަލުކުރައްވައި، އިތުރު މަސައްކަތްތައް ކުރުމަށް މަޝްވަރާކުރައްވާފަ އެވެ.
މި ކޮންފަރެންސްގައި ވަނީ ތިމާވެށީގެ ގޮތުންނާއި ދިރޭތަކެތީގެ ގޮތުން ހާއްސަ ސަރަހައްދުތައް ކަނޑައެޅުމާ ގުޅޭ ގޮތުން ވެސް އެއްބަސްވުމަކަށް އާދެވިފަ އެވެ. މިގޮތުން ރާއްޖެއިން މިހާރު ވެސް ވަނީ ބ. އަތޮޅާއި އއ. އަތޮޅުގެ މަޑިވަރު ސަރަހައްދު މި ގޮތަށް ކަނޑައަޅާފަ އެވެ.
ކޮންމެ ދެ އަހަރަކުން އެއްފަހަރު ބާއްވާ މި ކޮންފަރެންސްގައި ދިރޭތަކެތީގެ ނަސްލުތައް ހިމާޔަތް ކުރުމަށް ކުރާ މަސައްކަތްތައް މޮނިޓަރ ކުރާނެ ނިޒާމަކާއި، އެކަމަށް ކުރާ ހޭދަ އިތުރު ކުރުމަށް މަޝްވަރާކުރެވުނެވެ.
ތިމާވެށި މިނިސްޓްރީން ނެރުނު ނޫސްބަޔާނުގައި ބުނީ މި ފަންޑު އުފެއްދުމަކީ މުއާހަދާ ތަންފީޒު ކުރުން ވަރުގަދަ ކުރުމަށް އެޅޭނެ މުހިންމު ފިޔަވަޅެއް ކަމަށެވެ. އަދި މި ފަންޑުން ތަރައްގީވަމުން އަންނަ ގައުމުތަކަށް ބޮޑެތި ފައިދާތަކެއް ކުރާނެ ކަމަށް ވެސް ބުންޏެވެ.
ސީބީޑީ އަކީ ރިއޯ މުއާހަދާތަކުގެ ތެރެއިން އެއް މުއާހަދާ އެވެ. މި މުއާހަދާގެ މައިގަނޑު މަގުސަދަކީ ދިރޭތަކެތީގެ ނަސްލުތައް ރައްކާތެރިކޮށް ހިމާޔަތް ކުރުމެވެ.
