އެޕާޓީގެ އިންތިހާބު ބޭއްވުމަށް އެންމެ ފުރަތަމަ ނިންމާފައިވަނީ މިދިޔަ އޮކްޓޯބަރު މަހުގެ 19 ވަނަ ދުވަހުއެވެ. ނަމަވެސް ފަހުން ވަނީ މިމަހުގެ 9 އަކަށް އިންތިހާބު ފަސްކޮށްފަ އެވެ.
ޕީއެންސީން މިއަދު ނެރުނު އިއުލާނެއްގައި ބުނީ، މިމަހުގެ ނުވަ ވަނަ ދުވަހު ބޭއްވުމަށް ހަމަޖެހިފައިވާ އެޕާޓީގެ ދާއިރާތަކުގެ މަގާމުތަކުގެ އިންތިހާބު މިމަހުގެ 23 ވާ ހޮނިހިރު ދުވަހަށް ފަސްކުރީ 10 ވާ އާދީއްތަ ދުވަސް ރަސްމީ ބަންދު ދުވަހެއްގެ ގޮތުގައި ހަމަޖެއްސުމާ ގުޅިގެން ކަމަށެވެ.
އެގޮތުން ޖުމްހޫރީ ދުވަސް ކަމަށްވާ ނޮވެމްބަރު 11 ވާ ހޯމަ ދުވަހާއި ގުޅިގެން މިމަހުގެ 10 ވަނަ ދުވަސް އެއީ ރަސްމީ ބަންދު ދުވަހެއްގެ ގޮތުގައި ރައީސް، ޑރ. މުހައްމަދު މުއިއްޒު ހަމަޖެއްސެވުމާއި ގުޅިގެން އެ ހަފްތާ ބަންދުގައި ގިނަ ބަޔަކު ރަށުން ބޭރަށް ދަތުރު ކުރުމަށް ހަމަޖެހިފައިވާ ކަމަށް އިއުލާނުގައި ފާހަގަކޮށްފައިވެ އެވެ. އެހެންކަމުން އެ ދުވަހު ވޯޓުލުމުގައި މެމްބަރުންނަށް ތަކުލީފުތައް ކުރިމަތިވާނެތީ، ކެނޑިޑޭޓުންނާއި މެމްބަރުންގެ އެދުމުގެ މަތިން އިންތިހާބު ފަސްކުރީ ކަމަށް އެ ޕާޓީން މައުލޫމާތުދެ އެވެ.
ޕީއެންސީން ބުނީ، ދާއިރާތަކުގެ އިންތިހާބުގެ ވޯޓު ނަގާ ތާރީހު ބަދަލުވުމާއި ގުޅިގެން އިންތިހާބު ބާއްވަން ޖެހޭ ދާއިރާތަކާއި ރަށްރަށް އަދި ކެނޑިޑޭޓުންގެ ނަންތައް އަދި ވޯޓު ލެވޭ މީހުންގެ ލިސްޓު މިމަހުގެ 10 ގައި އާންމު ކުރާނެ ކަމަށެވެ.
އިންތިހާބުގައި ދާއިރާގެ ރައީސުންގެ ގޮތުގައި އިންތިހާބުކުރާނީ ޕީއެންސީގެ މަޖިލިސް މެންބަރުން ނުހިމެނޭ ދާއިރާތަކަށެވެ. އަދި އެ ދާއިރާތަކަށް އިންތިހާބުކުރާނީ ނައިބުރައީސުންނެވެ.
