މި މަހު ފަސްވަނަ ދުވަހު ބާއްވާ އެމެރިކާގެ ރިޔާސީ އިންތިހާބުގައި ވާދަކުރައްވާ މައިގަނޑު ދެ ޕާޓީ ކަމަށްވާ ވެރިކަން ކުރައްވާ ޑިމޮކްރެޓިކް ޕާޓީއާއި ރިޕަބްލިކަން ޕާޓީން އަންނަނީ ވަރަށް ވާދަވެރިކޮށް ކެމްޕޭނު ކުރަމުންނެވެ.
ޑިމޮކްރެޓިކް ޕާޓީން ވާދަކުރައްވާ ކެންޑިޑޭޓް ނާއިބު ރައީސް ކަމަލަ ހެރިސް އާއި އިދިކޮޅު ރިބަޕްލިކަން ޕާޓީން ވާދަކުރައްވާ ޑޮނަލްޑް ޓްރަމްޕްގެ މެދުގައި އިންތިހާބު ކާމިޔާބު ކުރައްވާނީ ކޮން ބޭފުޅެއްތޯ ނަގާ ޕޯލްތައް ވެސް އިތުރުވެފައިވާއިރު، ގިނަ ޕޯލުތަކުގައި ދެ ބޭފުޅުން ވެސް އުޅުއްވަނީ ދާދި އެއް ވަރެއްގައެވެ.
ވަރަށް ފާޅުކަން ބޮޑު ގޮތެއްގައި ޑޮނަލްޑް ޓްރަމްޕަށް ތާއިދުކުރައްވާ އެމެރިކާގެ މަހުޖަނު އީލޮން މަސްކް އަންނަނީ ޓްރަމްޕް މޮޅުވުމަށް އެދި ބަހާއި އަމަލުން މަސައްކަތް ކުރައްވަމުން ނެވެ.
ރިޔާސީ އިންތިހާބުގައި ވާދަކުރައްވާ ކުރީގެ ރައީސް ޑޮނަލްޑް ޓްރަމްޕްގެ ކެމްޕެއިނަށް މިހާރު ވެސް 75 މިލިއަން ޑޮލަރު ހަދިޔާކޮށްފައިވާ އީލޮން މަސްކް ވިދާޅުވީ ޑިމޮކްރެޓިކް ކެންޑިޑޭޓު ކަމަލާ ހެރިސް އަކީ ބޮޑު ޖޯކެއް ކަމަށެވެ.
އަދި ކަމަލާ ހެރިސްގެ ޒައާމަތުގައި އެމެރިކާ މީހުން މާސްއަށް ނުދާނެ ކަމަށް ވެސް ޓެސްލާގެ ވެރިޔާ އީލޮން މަސްކް ވިދާޅުވި އެވެ.
ހިޔާލު ހޯދުމުގެ ވޯޓުތައް ދައްކާ ގޮތުން ޓްރަމްޕަށް ވުރެ ކަމަލާއަށް އޮތް ތާއީދު ބޮޑެވެ. ނަމަވެސް، ކަމަލާގެ ކިބާގައި ޓްރަޕްގެ ހުރި ވަރުގެ ސިޔާސީ ގާބިލުކަން ނެތުމަކީ ފަހަރެއްގައި ކަމަލާއަށް ވޯޓުން ތަފާތު ފެނިވަޑައިގެންފާނެ ކަމެކެވެ.
މި މަހުގެ ފަސް ވަނަ ދުވަހު ބާއްވާ އެމެރިކާގެ އިންތިހާބުގައި ކަމަލާ އަށް ވޯޓު ދޭން ތިބި މީހުންނަށް "ޑޮލަރު" ބަހާ އިންތިހާބަށް ނުފޫޒު ފޯރުވުމަށް މަސައްކަތް ކުރައްވާ ކަމަށް ވިދާޅުވެ ކަމަލާގެ ކެންޕެއިން ޓީމުން އަންނަނީ އިލޮން މަސްކްއަށް ވަރަށް ބޮޑަށް ފާޑުކިޔަމުން ނެވެ.
ޑިމޮކްރެޓް ޕާޓީގެ މެމްބަރު އަދި ޕެންސިލްވޭނިއާގެ ގަވަރުނަރު ޖޯޝް ޝަޕީރޯ ވަނީ އީލޮން މަސްކް ފާޅުގައި ވޯޓުލާން "ސްވިންގް" ސްޓޭޓްތަކުން ރަޖިސްޓްރީކުރާ މީހުނަށް ފައިސާ ބަހާތީ ވަރަށް ކަންބޮޑުވާ ކަމެއް ކަމަށް ވިދާޅުވެ، ގާނޫނު ތަންފީޒުކުރާ އިދާރާތަކުން އެކަން ތަހުގީގު ކުރުމަށް ގޮވާލައްވާފަ އެވެ.
ފޯބްސް މަޖައްލާގެ އަންދާޒާތަކުން ދައްކާ ގޮތުގައި މަސްކްގެ މިލްކިއްޔާތުގައި 248 ބިލިއަން ޑޮލަރު އެބަހުއްޓެވެ. އޭނާ އަކީ މިހާރު ދުނިޔޭގެ އެންމެ މުއްސަނދި މީހާއެވެ.
