މި ބަދަލު ގެނެވުނީ ދުންފަތް ކޮންޓްރޯލް ކުރުމުގެ ގާނޫނަށް ގެނެވުނު އިސްލާހަށް އަމަލުކުރަން ފެށުމާ ގުޅިގެންނެވެ.
މި އިސްލާހުގެ ދަށުން، ދުންފަތާއި ދުންފަތުން އުފައްދާފައިވާ ބާވަތްތަކާއި، ދުންފަތު އެކުލެވޭ ތަކެއްޗާއި، ދުންފަތުގެ ބަދަލުގައި ބޭނުންކުރާ ބާވަތްތައް ބެހެއްޓުމަށް ބޮންޑެޑް ވެއާހައުސް ރަޖިސްޓްރީ ނުކުރެވޭނެ އެވެ. މީގެ އިތުރުން، އިލެކްޓްރޯނިކް ސިނގިރޭޓާއި ވޭޕް ކުރުމަށް ބޭނުންކުރާ އާލާތްތަކާއި، އެއާ ގުޅުންހުރި އުފެއްދުންތައްވެސް ބޮންޑެޑް ވެއާހައުސްތަކުގައި ބެހެއްޓުން މަނަލެވެ.
މި ބަދަލާ ގުޅިގެން، އަމިއްލަ ފަރާތްތަކުގެ ކުދިކުދި ބޭނުންތަކަށް ގެންނަ ދުންފަތާއި ނިކޮޓިން އެކުލެވޭ ބާވަތްތަކުން ޑިއުޓީ އިނާޔަތް ދިނުން ކަސްޓަމްސްއިން ވަނީ ހުއްޓާލާފަ އެވެ. އަދި ބަނގުރަލާއި އޫރުމަހުގެ ބާވަތްތަކާއި ދުންފަތުގެ ބާވަތްތައް ޝިޕް ސްޓޯސްގެ ގޮތުގައި އެތެރެކުރުމުގެ ހުއްދަ ދޫކުރުންވެސް ވަނީ ހުއްޓާލާފަ އެވެ.
ކަސްޓަމްސްގެ އާންމު ގަވާއިދަށް ގެނެވުނު މި އިސްލާހުގައި، ޖޫރިމަނާ ކުރެވޭނެ އިތުރު ތިން ގޮތެއްވެސް ވަނީ ހިމަނާފަ އެވެ. މީގެ ތެރޭގައި ރާއްޖެއަށް ސިއްރުން މުދާ އެތެރެކުރުމާއި، އުޅަނދުފަހަރު ހުއްދަ ނެތި އެހެން ބަނދަރަކަށް ދިއުމާއި، އޭއައިއެސް ނިއްވާލުން ހިމެނެ އެވެ. މި ކަންކަމަށް 100،000 ރުފިޔާއިން ފެށިގެން 200،000 ރުފިޔާއާ ހަމައަށް ޖޫރިމަނާ ކުރެވޭނެ އެވެ.
މި އިސްލާހުތަކުގެ މައިގަނޑު މަގުސަދަކީ ދުންފަތުގެ ބޭނުންކުރުން މަދުކުރުމާއި، ރާއްޖެއަށް އެތެރެކުރާ މުދަލުގެ ކޮންޓްރޯލް ހަރުދަނާކުރުން ކަމަށް ބެލެވެ އެވެ. މި ބަދަލުތަކުގެ ސަބަބުން ދުންފަތުގެ ބާވަތްތައް ރާއްޖެއަށް އެތެރެކުރުމަށް ހުރި ފަސޭހަތައް މަދުވެގެންދާނެ ކަމަށް ލަފާކުރެވެ އެވެ.
