އިމިގްރޭޝަނުން ބުނީ މި އިންސްޕެކްޝަން ހިންގީ އޮކްޓޯބަރު 31 އާއި ނޮވެންބަރު 1 ގައި ކަމަށެވެ.
އިމިގްރޭޝަނުން ބުނި ގޮތުގައި މި އިންސްޕެކްޝަނުގައި ހައްޔަރުކުރެވުނު 7 މީހުންނަކީ ވެސް ފިރިހެނުންނެވެ. އަދި މި މީހުން ހައްޔަރުކުރެވުނީ ސައްހަ ވިސާއެއް ނެތި ހުޅުމާލޭގައި އުޅެމުން ދަނިކޮށް ކަމަށް އިމިގްރޭޝަނުން މައުލޫމާތު ދިނެވެ.
މިހާރުގެ ސަރުކާރުން ވެރިކަމާ ހަވާލުވި ފަހުން ރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދައި، އެ މީހުންނާ މެދު ފިޔަވަޅު އެޅުމުގެ މަސައްކަތް ދަނީ ކުރަމުންނެވެ. މި ގޮތުން މިދިޔަ އަހަރުގެ ނޮވެންބަރު 17 އިން ފެށިގެން މިދިޔަ މަހުގެ 17 އާ ހަމައަށް 4،054 ބިދޭސީން ވަނީ އަނބުރާ އެ މީހުންގެ ގައުމަށް ފޮނުވާލާފައެވެ.
އިމިގްރޭޝަނުން ހިއްސާކުރި ތަފާސް ހިސާބުތަކުން ދައްކާ ގޮތުގައި އެންމެ ގިނަ އަދަދެއްގެ ބިދޭސީން ފޮނުވާލާފައި ވަނީ މި އަހަރުގެ ޖޫން މަހުގައެވެ. އަދި މި މަސައްކަތް ކުރިއަށް އޮތް ތަނުގައި ވެސް ކުރިއަށް ގެންދާނެ ކަމަށް އިމިގްރޭޝަނުން ބުނެފައި ވެ އެވެ.
ގަވާއިދާ ހިލާފަށް ރާއްޖޭގައި އުޅޭ ބިދޭސީންގެ އަދަދު އިތުރުވަމުން ދިއުމާ ގުޅިގެން، މި މައްސަލަ ހައްލުކުރުމަށް ސަރުކާރުން އެކި ފިޔަވަޅުތައް އަޅަމުން ދެއެވެ. މީގެ ތެރޭގައި އިންސްޕެކްޝަންތައް އިތުރުކުރުމާއި، ވަޒީފާދޭ ފަރާތްތަކާ މެދު ފިޔަވަޅު އެޅުން ހިމެނެ އެވެ.
