އަނިޔާގެ ސަބަބުން އަހަރެއްހާ ދުވަހު ކުޅުމާ ދުރުގައި ހުރުމަށް ފަހު، މިހާރު އަލުން ކުޅެން ފަށާފައިވާ ނޭމާއަށް ކުރިއަށް ހުރި މެޗުތަކުން ފުރުސަތު ނުލިބުނު އިރު، އޭނާއަކީވެސް އަދިވެސް ބްރެޒިލްގެ ޓޮޕް ސްކޯރާއެވެ.
އަނިޔާގެ ސަބަބަން ކުޅުމާ ދުރުގައި ހުރުމަށް ފަހު އެނބުރި އައިސް ގައުމީ ޓީމުން ފުރުސަތު ހޯދަން މަސައްކަތް ކުރާނެ ކަމަށް، ސައުދީ ލީގުގައި މިހާރު ކުޅެމުން އަންނަ ނޭމާވަނީ ބުނެފައެވެ.
ކުރިއަށް އޮތް އިންޓަނޭޝަނަލް ބްރޭކުގައި ކުޅުމަށް ހަމަޖެހިފައިވާ މެޗުތަކަށް އެކުލަވައިލި ބްރެޒިލް ސްކޮޑުގައި، އެންމެ ފަހުން ކުޅުނު މެޗުތަގައި ނުކުޅޭ ރެއާލް މެޑްރިޑުގެ ވިންގް ވިނީޝިއުސް ޖޫނިއާވަނީ ހިމަނާފައެވެ.
މިދިޔަ އިންޓަނޭޝަނަލް ބްރޭކްގައި ކަރަށް ލިބުނު އަނިޔާއެއްގެ ސަބަބުން ބްރެޒިލްގެ މެޗުތަކުގައި ބައިވެރިނުވެވުނު ވިނީޝިއުސް އެނބުރިއައިއިރު، ބްރެޒިލަށް ދެން އެންމެ އަވަހަށް އޮތީ މި މަހުގެ 15 ވަނަ ދުވަހު ރަށުން ބޭރުގައި ވެނެޒުއެލާއާ ބައްދަލުކުރަންޖެހޭ މެޗެވެ. އެއަށްފަހު، އޭގެ ފަސް ދުވަސްފަހުން އަމިއްލަ ދަނޑުގައި ނިކުންނާނީ އުރުގުއޭއާ ދެކޮޅަށެވެ.
