ޓެނިސް އެސޯސިއޭޝަން އޮފް މޯލްޑިވްސްގެ އިންތިހާބުގައި ރައީސްކަމާއި ނައިބު ރައީސްކަމުގެ އިތުރުން މެމްބަރުންގެ ތެރެއިން އިންތިހާބުކުރާ ތިން މެމްބަރުން ވަނީ ހޮވާފައެވެ. ކޮންމެ މަގާމަކަށްވެސް ކުރިމަތިލާފައިވަނީ އެކަކެވެ. އެހެންކަމުން ނެގީ ފެންނަ ނުފެންނަ ވޯޓެކެވެ.
އެސޯސިއޭޝަނުގެ ރައީސްކަމަށް ހަފީޒް ދެވަނަ ދައުރަކަށް އިންތިހާބުވެވަޑައިގެންނެވީ ވޯޓުލި ޖުމްލަ 95 މެމްބަރުންގެ 93 ވޯޓާއެކު އެވެ. ނުފެންނަ ކަމަށް ދެ މެމްބަރުން ވަނީ ވޯޓުލާފައެވެ. ހަފީޒް ވަނީ 2020-2024 އާއި ހަމައަށް އެއް ދައުރު ފުރިހަމަކުރައްވާފައެވެ. ދެވަނަ ދައުރުގެ މުއްދަތު ހަމަވާނީ 2028 ގައެވެ.
ޓެނިސް އެސޯސިއޭޝަނުގެ ނައިބު ރައީސްކަމަށް އިންތިހާބުވަޑައިގެންނެވީ ކުރީގެ މަޝްހޫރު ޓެނިސް ތަރި އިގްނާޒް މަންސޫރެވެ. އެސޯސިއޭޝަނުގެ ބޯޑަށް އިންތިހާބުވި ތިން މެމްބަރުންނަކީ އައިމިނަތު މަލީލާ ސޯލިހާއި ހަސަން ޝާމް އަދި މުހައްމަދު ފަސީހެވެ.
