މި ގަވާއިދުގެ ދަށުން، ވިޔަފާރީގެ ބޭނުމަށް ނޫން ގޮތަކަށް ޕޯސްޓުން ދުންފަތު ގެނެސްފިނަމަ، އެ ފަރާތެއް ޖޫރިމަނާ ކުރުމަށްފަހު އެ ތަކެތި ނައްތާލެވޭނެ އެވެ.
ކަސްޓަމްސްއިން ބުނީ މި ގަވާއިދުގެ ދަށުން، ޕޯސްޓު ނުވަތަ ކޮރިއަ މެދުވެރިކޮށް ނުވަތަ އޯޑަރުކޮށްގެން ވިޔަފާރީގެ ބޭނުން ފިޔަވައި އެހެނިހެން ހާލަތްތަކުގައި ދުންފަތުގެ ބާވަތްތައް ރާއްޖެއަށް އެތެރެކޮށްފިނަމަ، އެ ތަކެތި ރާއްޖެ އެތެރެކުރި ފަރާތް ޖޫރިމަނާ ކުރެވޭނެ ކަމަށެވެ. އަދި ޖޫރިމަނާ ކުރުމަށްފަހު، ކަސްޓަމްސްގެ އާންމު ގަވާއިދާ އެއްގޮތަށް އެ ތަކެތި ނައްތާލެވޭނެ ކަމަށް ވެސް ބުންޏެވެ.
އަދި ތިމާވެއްޓަށް ގެއްލުން ނުވާ ގޮތަށް އެ ތަކެތި ނައްތާލުމަށް ހިނގާ ހަރަދު ދައްކަންޖެހޭނީ ތަކެތި ރާއްޖެ ގެނައި ފަރާތުން ކަމަށް ވެސް ގަވާއިދުގައި ބަޔާންކޮށްފައިވެ އެވެ. މީގެ އިތުރުން، ހިފަހައްޓާ ތަކެތި ކަސްޓަމްސްގެ ބެލުމުގެ ދަށުގައި ހުންނައިރު ހިނގާ ހަރަދު ވެސް ދައްކަންޖެހޭނީ އެ ފަރާތުން ކަމަށް ކަސްޓަމްސްއިން ބުންޏެވެ.
މި ގަވާއިދަށް ގެނެވުނު އިސްލާހާ އެކު، ދުންފަތުގެ ބާވަތްތައް ރާއްޖެއަށް އެތެރެކުރާ މަރުހަލާގައި ގަވާއިދާ ހިލާފުވާ ފަރާތްތައް ޖޫރިމަނާ ކުރުމާއި ޖޫރިމަނާ ފައިސާ ނުދައްކާ ފަރާތްތަކުގެ އަތުން ފައިސާ ހޯދުމުގެ މަސައްކަތް ކުރާނީ ކަސްޓަމްސްއިން ކަމަށް ވެސް އެ އިދާރާއިން ބުންޏެވެ.
