މާފުށީ ދާއިރާގެ މެންބަރު ހުސައިން ރިޒާ އާދަމް ހުށަހެޅި ބިލުގައިވާ ގޮތުން، މި ކުށް ކުރާ ފަރާތްތަކަށް އެންމެ ގިނަވެގެން 15 އަހަރަށް ޖަލަށްލެވޭނެ އެވެ. އަދި ލިބުނު ފައިދާގެ ދެ ގުނަ ނުވަތަ އެއް މިލިއަން ރުފިޔާއިން ޖޫރިމަނާ ކުރެވޭނެ އެވެ.
ބިލުގައި ބުނާ ގޮތުން، ދައުލަތުގެ މުވައްޒަފަކަށްވެ ހުރެ ލިބެމުންދާ އާމްދަނީއާ ނުބައްދަލު ދިރިއުޅުމުގެ ފެންވަރު ދެމެހެއްޓުމަކީ ކުށެކެވެ. އަދި އާއިލީ ނުވަތަ ވިޔަފާރީގެ ގުޅުމެއް އޮތް މީހެއްގެ ނަމުގައި މުދާ ނުވަތަ ފައިސާ ހޯދައި މިލްކު ކުރުމަކީވެސް ކުށެކެވެ.
މީގެ ކުރިން ރައީސް މުހައްމަދު މުއިއްޒު ވިދާޅުވީ މި ބިލު ހުށަހެޅުމުގެ މަގުސަދަކީ ދައުލަތުގެ އިދާރާތަކުގައި އަށަގެންފައިވާ ކޮރަޕްޝަނާއި ނުހައްގު މުއްސަނދިކަން ހޯދުމުގެ މައްސަލަތައް ތަހުގީގުކޮށް، ދައުވާކުރުމަށް ހުރި ގޮންޖެހުންތައް ނައްތާލުން ކަމަށެވެ.
މި ބިލު ފާސްވެއްޖެ ނަމަ، ދައުލަތުގެ އިސް މަގާމުތަކުގައި ތިބޭ މީހުންނާއި އެ މަގާމުތަކުގައި ކުރިން ތިބި މީހުން ހޯދާފައިވާ ނުހައްގު މުއްސަނދިކަމުގެ މައްސަލަތައް ބެލުން ފަސޭހަވެގެންދާނެ އެވެ. އަދި އެފަދަ މައްސަލަތަކުގައި ދައުވާކުރުމަށް ހުރި ގާނޫނީ ހުރަސްތައް ނައްތާލެވިގެންދާނެ އެވެ.
