ސަފީރު މުހައްމަދު ތާހާ، އަފްގާނިސްތާނުގެ އެމްބެސެޑަރާ ބައްދަލުކުރެއްވީ މިދިޔަ ހުކުރު ދުވަހު އިސްލާމްއާބާދުގައެވެ.
މި ބައްދަލުވުމާއި ގުޅިގެން ފޮރިން މިނިސްޓްރީން އިއްޔެ ނެރުނު ބަޔާނެއްގައި ބުނީ، މި ބައްދަލުވުމަކީ ދިވެހި ސަރުކާރުގެ ހުއްދައާއެކު ކުރިއަށް ގެންގޮސްފައިވާ ބައްދަލުވުމެއް ނޫން ކަމަށެވެ. އަދި މި ކަމާ ގުޅިގެން ދިވެހި ސަރުކާރުގެ ފަރާތުން އަޅަންޖެހޭ ފިޔަވަޅު ވަނީ އަޅާފައި ކަމަށް މިނިސްޓްރީން ބުނިއެވެ.
ސަރުކާރުން އެޅި ފިޔަވަޅެއްގެ ގޮތުން ތާހާ އަންބުރާ ރާއްޖެ ގެންނަން ވަނީ ނިންމާފައެވެ. އަދި އެކަން އޭނާއަށް ވަނީ އަންގާފައެވެ. އެހެންނަމަވެސް ސަރުކާރުން މިކަން ހާމަކޮށްފައެއް އަދި ނުވެއެވެ.
ޕާކިސްތާނުގައި ހުންނަ އަފްގާނިސްތާނުގެ އެމްބެސެޑަރުގެ އޮފީހުން ބުނެފައިވަނީ މި ބައްދަލުވުމުގައި ރާއްޖެއާއި އަފްގާނިސްތާނާ ދެމެދު ގުޅުން ބަދަހިކޮށް، ވިޔަފާރީގެ ގުޅުން އެކުލަވާލުމަށް މަޝްވަރާ ކުރި ކަމަށެވެ. އަދި އަފްގާނިސްތާނު މެދުވެރިކޮށް ސެންޓްރަލް އޭޝިޔާގެ އެހެން ގައުމުތަކާ ރާއްޖެއިން ވިޔަފާރި ކުރެވޭނެ މަގު ފަހި ކުރުމަށް ވެސް މަޝްވަރާ ކުރި ކަމަށް އެ އޮފީހުން ބުނެފައިވެ އެވެ.
