ފިތުރު ޒަކާތަށް ފައިސާގެ ގޮތުގައި މި އަހަރު 13.3 މިލިއަން ރުފިޔާ ލިބުނު ކަމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ބުނެފައެވެ. އެ ފައިސާއިން ފަގީރުންނަަށް ޖެހޭ އަދަދު ބެހުމަށްފަހު ބާކީވި 5 ލައްކަ ރުފިޔާ ގައްޒާގައި އުޅޭ ކުޑަކުދިންގެ ކާބޯތަކެއްޗަށް ދިނުމަށް ސަރުކާރުން ވަނީ ނިންމާފަ އެވެ.
އިސްލާމިކް މިނިސްޓްރީން ބުނީ އެ ފައިސާ ގައްޒާއަށް ފޯރުކޮށްދިނުމަށް މިދިޔަ އާދިއްތަ ދުވަހު އިސްރާ އެސޯސިއޭޝަނާ ހަވާލުކޮށްފައިވާ ކަމަށެވެ.
އިސްލާމިކް މިނިސްޓްރީން އާންމު ކުރި ތަފާސް ހިސާބުން ދައްކާ ގޮތުގައި މި އަހަރު ޒަކާތަށް ފައިސާގެ ގޮތުގައި ޖުމުލަ 13،264،819 ރުފިޔާ ވަނީ ލިބިފައެވެ. އެ ފައިސާ ފަގީރުން ގެ ދަފްތަރުގައި ތިބި ކޮންމެ މީހަކަށް 4500 ރުފިޔާ ބަހާފައިވާކަމަށް އިސްލާމިކް މިނިސްޓްރީން ބުނެއެވެ. އެހެންނަަވެސް ދަފްތަރުގައި ތިބީ ކިހާ މީހުންނެއް ކަމެއް އެ މިނިސްޓްރީ އަކުން ނުބުނެެއެވެ.
މާލޭ ސަރަހައްދުގައި މިދިޔަ އަހަރު ފިތުރު ޒަކާތުގެ ގޮތުގައި ބޮލަކަށް 8،000 ރުފިޔާ ބެހިއެވެ.
ގައްޒާގެ ކުޑަކުދިންނަށް ފިތުރު ޒަކާތުން 5 ލައްކަ ރުފިޔާ ހަދިޔާކުރުމަށް އިސްރާ އެސޯސިއޭޝަނާ ހަވާލުކުރަނީ
އިސްލާމިކް މިނިސްޓްރީން ބުނީ މިއީ މިހާތަނަށް ފިތުރު ޒަކާތުގެ ގޮތުގައި އެންމެ ގިނައިން ފައިސާ ލިބުނު އަހަރުކަމަށެވެ.
މިދިޔަ ހަތަރު އަހަރު ފިތުރު ޒަކާތުގެ ލިބުނު ފައިސާ
- 2024 ގައި / 12،594،777.92 ރުފިޔާ
- 2023 ގައި / 12،691،506.08 ރުފިޔާ
- 2022 ގައި / 11،669،385.10 ރުފިޔާ
މިއަހަރު ޒަކާތުގެ ގޮތުގައި 10،025.66 ކިލޯގެ ގޮވާން ލިބިފައިވާކަމަށް އިސްލާމިކް މިނިސްޓްރީން ބުނެއެވެ. އެއީ މިދިޔަ އަހަރަށްވުރެ ދަށް އަދަދެކެވެ.
މިދިޔަ ޒަކާތުގެ ގޮތުގައި 12،959.29 ކިލޯ ގޮވާން ވަނި ލިބިފައެވެ. އޭގެ ކުރިން 2023 ވަނަ އަހަރު 12،380.85 ކިލޯ ލިބުންއިރު 2022 ވަނަ އަހަރު ލިބުނީ 10،092 ކިލޯއެވެ.
