ހައުސިންގ މިނިސްޓަރު އަލީ ހައިދަރު ވިދާޅުވީ މި ސްކީމަކީ ރާއްޖޭގެ އެކި ރަށްރަށުގައި ފަޅަށް ހުރި ގޯތިތަކުގައި ގެދޮރު އިމާރާތްކުރުމަށް ފައިސާ ދޫކުރުމަށް އެކުލަވާލި ސްކީމެއް ކަމަށެވެ. އަދި މި ސްކީމުގެ ސަބަބުން މާލީ ތަނަވަސްކަން ނެތް އާއިލާތަކަށް ގެދޮރުގެ ތަނަވަސްކަން ލިބިގެންދާނެ ކަމަށް އޭނާ ވިދާޅުވި އެވެ.
ހައުސިންގ މިނިސްޓްރީން ބުނީ މި ސްކީމުގެ ދަށުން ހުސް ބިމެއްގައި އަލަށް އިމާރާތެއް ކުރުމަށް ނުވަތަ ނުނިމި ހުރި އިމާރާތެއް ނިންމުމަށް ނުވަތަ ބާވެފައިވާ އިމާރާތެއް މަރާމާތުކުރުމަށް ލޯނު ނެގިދާނެ ކަމަށެވެ. އަދި ދޫކުރެވޭ ލޯނުގެ އަދަދުން މަޝްރޫއު އެއްކޮށް ނިންމޭވަރު ވާންޖެހޭނެ ކަމަށް އެ މިނިސްޓްރީން ބުންޏެވެ.
މި ސްކީމަށް އެދެވޭނީ އަމިއްލަ ނަމުގައި ނުވަތަ ދައުލަތުން ދޫކޮށްފައިވާ ބޯހިޔާވަހިކަމެއް ނެތް ފަރާތްތަކަށެވެ. އަދި އިކުއިޓީއެއް ދައްކާކަށް ނުޖެހުނަސް، ޝަރީއާ އުސޫލުތަކާ އެއްގޮތަށް އަމަލުކުރުމަށް "ނޮމިނަލް ކޮންޓްރިބިއުޝަން" އެއް ދައްކަންޖެހޭނެ ކަމަށް މިނިސްޓްރީން ބުންޏެވެ.
ސްކީމަށް އެދި ހުށަހެޅުމަށް ހިޔާވެހި ޕޯޓަލް މެދުވެރިކޮށް ފޯމު ހުށަހެޅުމުގެ ފުރުސަތު ހުޅުވާލާނެ ކަމަށް މިނިސްޓްރީން މައުލޫމާތު ދިނެވެ.
