އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަަކަދައްކަވަމުން މިނިސްޓަރު ޝިޔާމް ވަނީ އީޔޫގެ ޓެރިފް ކުޑަކުރުމަށްޓަކައި ގާތްގަނޑަކަށް 12 އަހަރު ވެފައިކަމަށް ފާހަގަކޮށްފައެވެ.އަދި ރާއްޖޭ މިހާރު ހުރީ ސަސްޓެއިނަބަލް ފިޝަރީޒަގެ ޗެމްޕިއަނުންގެ ގޮތުގައި ކަމަށާއި ޗެމްޕިއަނުންގެ ގޮތުގައި ތިބެ ފުރަތަމަ ކަމަކަށް މަހުގެ ޓެރިފް ކުޑަކުރަން އެހާވަރަކަށް އާދޭސް ކުރާކަށް ނުޖެހޭނެކަަމަށް ޝިޔާމް ވިދާޅުވި އެވެ.
ދެމެހެއްތެނިވި މަސްވެރިކަމުގެ ޗެމްޕިއަނުންގެ ގޮތުގައި ހުރެ ތިމާވެށީގެ ރައްކާތެރިކަން ކަށަވަރުކުރުން ، އިކޯސިސްޓަމް ބެލެހެއްޓުން، އިކޯސިސްޓަމްއަށް ގެއްލުން ނުވާނެގޮތަށް ހަރަކާތްތައް ރާއްޖެއިން ފުޅާދާއިރާއެއްގައި ކުރާކަން ފާހަަގަކޮށް ޝިޔާމް ވިދާޅުވީ ރާއްޖެއަކީ އެންމެ ތިމާވެއްޓަށް ގެއްލުން ކުޑަކޮށް ނޫނީ ގެއްލުން ނުވާނެގޮތަށް މަސްވެރިކަން ކުރާ ގައުމުކަމަށެވެ.
ދުނިޔޭގައި ދެމަހެއްޓެނިވި މަސްވެރިކަމުގެ އެންމެ ކުރީގައި ރާއްޖެ ތިބިނަމަވެސް ހިތާމަވެރި ވާހަކައަކީ 12 އަހަރުތެރޭ ހުރިހާ ސަރުކާރުތަކުންވެސް، ވަރަށް ބޮޑަށް ހާރިޖީ ސިޔާސަތު ވަރުގަދަ ސަރުކާރުންތައް ކަަމަށް ވަކާލާތު ކުރާ ސަރުކާރުންވެސް ދައުރު ނިމި ހިނގާދިޔުމުންވެސް އެކަމަކަށް ހައްލެއް ނާންނަކަމަށެވެ.
ރައީސް ޑރ.މުހައްމަދު މުއިއްޒުގެ ފުރަތަމަ އަހަރުގެ ފުރަތަމަ ކޮޅު، އިޔޫއާއެކީގައި އެކަމުގައި ހޯދޭނެ ލުޔަކީ ކޮބާތޯ އާމެދު ވާހަކަދައްކަވާ އީޔޫކައުންސިލްގެ ރައީސްއާވެސް ބައްދަލުކުރެއްވި ކަަމަށް ޝިޔާމް ވިދާޅުވި އެވެ.
ރާއްޖެ ކަހަލަ އެންމެ ދެމެހެއްޓެނިވި މަސްވެރިކަމުގައި ތިބި ބަޔަކަށް އެކަމުގައި ޓެރިފް ބޮޑުވުމަކީ އަސްލުގައިވެސް "އަންފެއާ" ކަމެއްކަމަށް މިނިސްޓަރު ޝިޔާމް ވިދާޅުވިއެވެ. އަދި ސަރުކާރާއި، ފިޝަރީޒް މިނިސްޓްރީ އަދި އެހެން މިނިސްޓްރީތަކާއެކުވެސް ކުރެވޭ މަސައްކަތްތަކުގައި ރާއްޖޭގެ މަހަށް އީޔޫ ޓެރިފް ކުޑަކުރުމަށްޓަކައި ކުރެވެން ހުރި މަސައްކަތްތަކެއް ހުރިހާ ޕްލެޓްފޯމެއްގައި ސަރުކާރުން ކުރާ ވާހަަކަ، އޭގެ ޔަގީން ޝިޔާމް ދެއްވި އެވެ.
އެގޮތަށް ކާމިޔާބުވެއްޖެނަމަ ޔޫކޭ މާކެޓަށް ރާއްޖެއިން ބޭރުކުރާ މަހަށް، މަހުގެ ޑިއުޓީއަށް ލުޔެއް ލިބޭނެ ކަަމަށް ޝިޔާމް ވިދާޅުވި އެވެ. އަދި ޔޫކޭ އަށް ކަނޑައަޅުއްވާއިި ހުރި ސަފީރުވެސް އެ މަސައްކަތް މިހާރު އެބަ ކުރިއަށްގެންދޭ ކަަމަށާއި މިނިސްޓްރީނާއި ޔޫރަޕްގެ އިއްތިހާދުގެ ސަފީރުން އެގައުމުތަކާއި އެކީގައިވެސް އެ މަސައްކަތް ކުރައްވާކަމަށް ޝިޔާމް ވިދާޅުވި އެވެ.
