އެމްޑީޕީން ބޭއްވި ލާމަރުކަޒީ ގުޅުން ކޮންފަރެންސްގައި ވާހަކަފުޅު ދައްކަވަމުން މޭޔަރު އާޒިމް ވިދާޅުވީ ކައުންސިލަށް 15 ކޮންސަލްޓަންޓުން ނަގާފައިވާ ކަމަށާއި އެއީ އެމްޑީޕީގެ މެންބަރުން ކަމަށެވެ. އެ ވާހަކަ ލައިވް ޓީވީގައި ދެއްކެވުމާ ގުޅިގެން އެމްޑީޕީގެ ޗެއާޕާސަން ފައްޔާޒް އިސްމާއިލް ވަނީ އެ ވާހަކަ ސޯޝަލް މީޑިއާގައި އާންމު ނުކުރުމަށް އެދިވަޑައިގެންފަ އެވެ.
ނަމަވެސް މައުލޫމާތު ހޯދައި ލިބުމުގެ ހައްގުގެ ގާނޫނުގެ ދަށުން ރާއްޖޭގެ ނޫހަކުން ހޯދި މައުލޫމާތުން އެނގުނު ގޮތުގައި ކައުންސިލުން މިހާތަނަށް ނަގާފައިވަނީ އަށް ކޮންސަލްޓަންޓުންނެވެ. އެ މީހުންނަށް އިތުރު ވަގުތުގެ އެލަވަންސް ނުލައި މުސާރައިގެ ގޮތުގައި މަހަކު 261،000 ރުފިޔާ ހަރަދުކުރާ ކަމަށް ކައުންސިލުން ބުނެއެވެ.
ކޮންސަލްޓަންޓުންގެ ތެރޭގައި ޖެންޑާ މިނިސްޓްރީގެ ކުރީގެ ސްޓޭޓް މިނިސްޓަރު މުހައްމަދު ޝިހާބާއި، އެމްޓީސީސީގެ ކުރީގެ ޖެނެރަލް މެނޭޖަރު ރަމްޒީ އަބޫބަކުރާއި، އިކޮނޮމިކް މިނިސްޓްރީގެ ކުރީގެ ޑެޕިއުޓީ މިނިސްޓަރު މަރިޔަމް ނާޒިމާއާއި، ޕީއެސްއެމްގެ ކުރީގެ އެމްޑީ އަލީ ހާލިދު ހިމެނެ އެވެ.
