ކުޑޫ ހުށަހެޅުއްވި ގަރާރުގައި ވިދާޅުވެފައިވަނީ، އިޒްރޭލް ޕާސްޕޯޓު މަނާކުރުމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ހުށަހެޅުއްވި ބިލު މަޖިލީހުގެ 241 ކޮމިޓީގައި އޮންނަތާ ހަތަރު މަސް ވެއްޖެ ކަމަށެވެ. އަދި ސަރުކާރުން ކެބިނެޓް ބައްދަލުވުމެއްގައި އިޒްރޭލް ޕާސްޕޯޓު މަނާކުރަން ނިންމި ނަމަވެސް، އެކަމަށް އަމަލީ އެއްވެސް ފިޔަވަޅެއް އަޅާފައި ނުވާ ކަމަށް ވެސް ގަރާރުގައި ފާހަގަކުރައްވައިފައިވެ އެވެ.
މަޖިލީހުގެ އަގުލަބިއްޔަތު އޮތީ ސަރުކާރު ހިންގާ ޕާޓީގެ އަތްމަތީގައި ކަމަށާއި، އެހެން ކަންކަން ދައުރުން ބޭރުގައި ވެސް ނިންމަމުންދާއިރު، މި ބިލުގެ މަސައްކަތް ލަސްވަމުންދާ ކަމަށް ކުޑޫ ވިދާޅުވި އެވެ. 241 ކޮމިޓީން މިއަދު ބޭއްވި ބައްދަލުވުމުގައި މެންބަރުން ވިދާޅުވެފައިވަނީ މި ދައުރުގެ ތެރޭގައި އެ ބިލުގެ މަސައްކަތް ނިންމޭނެ ކަމަކަށް ނުބެލެވޭ ކަމަށެވެ.
