އަޒަރުބައިޖާންގެ ބާކޫގައި މިހާރު ކުރިއަށް ގެންދާ ކޮންފަރެންސް އޮފް ދަ ޕާޓީސް (ކޮޕް29) ސަމިޓުގައި، ކްލައިމެޓް ފައިނޭންސާ ގުޅޭ މަތީ ފަންތީގެ ބައްދަލުވުމުގައި ރައީސް ވިދާޅުވީ، މޫސުމީ ބަދަލުތަކާ ގުޅިގެން ރާއްޖޭން ވެސް ހިފާފައިވާ އަމާޒުގެ މަތީގައި ހަރުދަނާ ފިޔަވަޅުތަކެއްގައި އަމަލީ ސިފަ ޖައްސަން ފަށާފައިވާ ކަމަށެވެ.
އަދި މިއީ މޫސުމީ ބަދަލުތަކާއެކުވެސް ތަރައްގީވެފައިވާ ވިލުންތެރި ގައުމަކަށް ވުމަށް އޮތް މަގުޗާޓު ކަމަށްވީ ނަމަވެސް އެ ޕްލޭންތަކާއި މަސައްކަތަކަށް ހުރަސް އެޅެނީ ވިލުންތެރިކަމަށް ބޭނުންވާ ފައިސާ ނުލިބޭތީ ކަމަށެވެ.
ރައީސް ވިދާޅުވީ ދުނިޔެއިން ފެންނަމުންދަނީ ހަނގުރާމަތަކަށް ނިކަން ފަސޭހަކަމާ އެކު ފައިސާގެ އެހީތެރިކަން އޮއްސަމުންދާތަން ކަމަށާއި އެކަމަކު މޫސުމީ ބަދަލުތަކަށް ނަމަ އެ އެހީތެރިކަން ފޯރުކޮށްދެނީ ވަރަށް ބަލައިގެން ކަމަށެވެ. އިސްކަންދިނުމުގެ އެ ތަރުތީބު ބަދަލުކުރަން އެމަނިކުފާނު ގޮވާލެއްވި އެވެ.
އަމިއްލަ ފަރާތްތައް ރަސްމީ މާލީ އިދާރާތަކާ ގުޅުވައިދީ، ލުއި ގޮތެއްގައި މާލީ އެހީ ލިބޭނެ މަގުފަހިކޮށްދޭންޖެހޭ ކަމަށް ރައީސް ވިދާޅުވި އެވެ.
ރައީސް ވިދާޅުވީ، ރާއްޖެ ފަދަ ގައުމުތަކަށް އަތް އުރާލައިގެން ދެން ތިބެވެން ނެތް ކަމަށާއި މޫސުމީ ބަދަލުތަކާ ދެކޮޅަށް ކުރާ މަސައްކަތުގައި އަމަލީ ސިފަ ޖައްސަންޖެހޭ ވަގުތު ޖެހިއްޖެ ކަމަށެވެ.
ކޮޕް29ގެ ހައި-ލެވެލް ރައުންޑްޓޭބަލްގެ މިފަހަރުގެ ބައްދަލުވުމުގައި، ގައުމުތަކުގެ ވެރިންނާއި ބައިނަލްއަގުވާމީ މާލީ އިދާރާތަކާއި މަލްޓިލެޓްރަލް ޑިވެލޮޕްމަންޓް ބެންކުތަކުން ބައިވެރިވެ، ޕެރިސް އެގްރީމަންޓްގެ ލަނޑުދަނޑިތައް ބިންގަލަކަށް ބަލައިގެން އެ ލަނޑުދަނޑިތައް ފުޅާކުރުމުގައި އާ އަމާޒުތަކެއް ކަނޑައެޅުމަށް ފައިސާ ހޯދުމާ ގުޅޭ މަޝްވަރާކޮށްފައިވެ އެވެ.
