އެންޑީއޭއިން މި އޮޕަރޭޝަން ހުއްޓުމެއް ނެތި ކުރިއަށް ގެންދާނެއެވެ. އަދި މި އޮޕަރޭޝަންގައި މަގުމަތީގައި ސަލާންޖަހާ މީހުންނާއި، މަސްތުވާތަކެތި ބޭނުންކުރާ މީހުންނާއި، ވައްކަމާއި ފޭރުމުގައި ހަރަކާތްތެރިވާ މީހުންނާއި، މިސްކިތްތަކުގައި ނިދާ މީހުން ހިމެނެއެވެ.
އެންޑީއޭއިން ފަށާފައިވާ މި އޮޕަރޭޝަންގައި ފަރުވާދޭ ނިޒާމު ހަރުދަނާކުރާއިރު ރިލެޕްސް ޕްރިވެންޝަން އަދި ރީއިންޓެގްރޭޝަނާއި އާފްޓާކެއާގެ އިތުރުން ޑްރަގް ޕްރިވެންޝަން މަސައްކަތްތަކަށް ހާއްސަ ސަމާލުކަމެއް ދޭނެއެވެ.
އެންޑީއޭ އިން މިހާރު ދެމުންދަނީ ރެސިޑެންޝަލް އަދި ނޮން ރެސިޑެންޝަލް ފަރުވާ އެވެ. މުޅި ރާއްޖޭގައި ޑްރަގް ފަރުވާ ދިނުމަށް 350 އެނދު ހުރި ކަމަށް އެންޑީއޭ އިން ބުނެފައިވެ އެވެ. މީގެ ތެރޭގައި ހިންމަފުށީގައި ހުންނަ ތެރަޕިއުޓިކް ކޮމިއުނިޓީ ރިހެބިލިޓޭޝަން ސެންޓަރާއި، އައްޑޫ، ފުވައްމުލައް އަދި ތިނަދޫގައި ހުންނަ ޑީޓޮކްސް ފެސިލިޓީތައް ހިމެނެ އެވެ.
