ރަސްދޫ ކައިރީ އޮންނަ ގަންގެހި ރިސޯޓު ބޭރުގައި ސްނޯކެލިން އަށް ގޮސް އުޅުނިކޮށް އުމުރުން 27 އަހަރުގެ ޗައިނާ މީހަކު މަރުވީ މިިދިޔަ މަހުގެ 13 ވަނަދުވަހުއެވެ.
ރަސްދޫ ކައިރިން ގެނބިގެން ޗައިނާ ފަތުރުވެރިޔަކު މަރުވުމާއި ކ. މާފުށީގައި ސްނޯކްލިން އަށް ގޮސް އުޅުނު ޗައިނާ ފަތުރުވެރިޔަކު މަރުވި މައްސަލަގައި ޓްއަރިޒަމް މިނިސްޓްރީގެ އިސްވެރިން މިއަދު ވަނީ މަޖިލީހުގެ ގަވައިދު ކޮމިޓީއަށް ހާޒިރުކޮށްފައެވެ. ކ. މާފުށީގައި ސްނޯކްލިން އަށް ގޮސް އުޅުނު ޗައިނާ ފަތުރުވެރިޔާ މަރުވީ މިދިޔަ މަހުގެ ހަތް ވަނަދުވަހުއެވެ.
ކޮމެޓީގައި ވާހަކަ ދައްކަވަމުން ޓޫރިޒަމް މިނިސްޓްރީގެ ސްޓޭޓް މިނިސްޓަރު އަހުމަދު ނާޒިމް މުހައްމަދު ވިދާޅުވީ ރަސްދޫކައިރިން މަރުވި ފަތުރުވެރިޔާ ސްނޯކްލިންއަށް ގެންދިޔަ ތަނަކީ ރަޖިސްޓްރީކޮށްގެން ހިންގި ތަނެއް ނަމަވެސް އެ ހާދިސާ ހިނގިއިރު އެތަނުގެ ލައިންސަންސް އޮތީ މުއްދަތު ހަމަވެ އާ ނުކޮށްކަމަށެވެ. އަދި ލައިސަންސް އާކުރަން ހުށައެޅީ އެ ހާދިސާ ހިނގި ފަހުންކަމަށްވެސް ނާޒިމް ވިދާޅުވިއެވެ. އެހެންކަމުން ގާނޫނީ ގޮތުން އެޅެން އޮތް އެންމެ ހަރުކަށި ފިޔަވަޅެއް އެތަނާއި މެދު އެޅުމަށް އަންގާފައިވާކަމަށްވެސް ނާޒިމް ވިދާޅުވިއެވެ.
ކޮމެޓީގައި ވާހަކަ ދައްކަވަމުން ޓްއަރިޒަމް މިނިސްޓްރީގެ ވެރިން ވިދާޅުވީ އެންމެ ފުޅާކޮށް ލޯކަލް ޓޫރިޒަމް ހިންގާ ސަރަހައްދުތަކުގައި ގަވާއިދާ ހިލާފަށް، ރަޖިސްޓްރީ ނުކޮށް ހިންގާ ގެސްޓް ހައުސްތައް ހޯދުމަށް ކުރިއަށް އޮތް ދެ ހަފްތާގެ ތެރޭގައި ހާއްސަ އިންސްޕެކްޝަނެއް ކުރިއަށް ގެންދަން ނިންމާފައިވާކަމަށެވެ.
