މަޖިލީހުގެ ރައީސް މުހައްމަދު އަބްދުއްރަހީމަށް ފޮނުވި ސިޓީއެއްގައި ކުޑޫ ވިދާޅުވީ، ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރު މާރުކުރަން ޖެހުމާ ގުޅިގެން ޓޫރިޒަމް ދާއިރާގައި ވަރަށް ބޮޑެތި ކަންބޮޑުވުންތަކެއް އުފެދިފައިވާ ކަމަށެވެ.
ކުޑޫ ވިދާޅުވީ މި ގަވާއިދަކީ ޓޫރިޒަމް ސިނާއަތުގެ ހަގީގަތްތަކާ ދުރު، މިވަގުތުގެ އިގްތިސާދީ ހާލަތާ ނުގުޅޭ ގަވާއިދެއް ކަމަށެވެ. އަދި މި ގަވާއިދާ ގުޅިގެން 50 އަށް ވުރެ ގިނަ ރިސޯޓުން އެމްއެމްއޭއަށް ކަންބޮޑުވުން ފާޅުކޮށް ސިޓީ ފޮނުވާފައިވާ ކަމަށް ވެސް އޭނާ ވިދާޅުވިއެވެ.
ކުޑޫ އެދިލައްވާފައި ވަނީ މި މައްސަލައާ ގުޅިގެން ޓޫރިޒަމް ދާއިރާގެ ފަރާތްތަކާއެކު އާންމުކޮށް ހުޅުވާލެވިގެން ބާއްވާ ބައްދަލުވުމެއް އަވަހަށް ބޭއްވުމަށެވެ. އެހެންނަމަވެސް އެމްއެމްއޭއިން ބުނީ ރާއްޖޭގައި ހިންގާ 174 ރިސޯޓުގެ ތެރެއިން 173 ރިސޯޓުން މިހާރު ވަނީ އާ ގަވާއިދުގެ ދަށުން ރަޖިސްޓްރީ ކޮށްފައި ކަމަށެވެ.
