އެޕާޓީން ނެރުނު ބަޔާނެއްގައި ބުނީ ޑިމޮކްރެޓިކް ނިޒާމެއްގެ ތެރެއިން، އަދި ރާއްޖޭގެ ގާނޫނުއަސާސީން ވެސް ބަލައިގަނެފައިވާ އެންމެހާ ހަމަތަކާއި އުސޫލުތަކަށް ބެލުމެއްނެތި، ނޫސްތަކުގެ މައްޗަށް ކަންކަން މަޖުބޫރުކުރުމާއި، ނޫސްވެރިންނަށް އަދަބު ދިނުމާއި، ނޫސްތައް ބަންދުކުރުމުގެ ބާރު އަތަށް ނެގޭގޮތަށް އެކުލަވާލައި ރައްޔިތުންގެ މަޖިލީހަށް ބިލު ހުށަހަޅާފައިވާތީ އިންތިހާއަށް ކަންބޮޑުވުން ފާޅުކޮށް އެކަން ކުށްވެރިކުރާކަމަށެވެ.
ޑޮމްކްރެޓްސް އިން ބުނީ އެ ބިލުން އެންމެ ބޮޑު އެއްކަމެއްގެ ގޮތުގައި ފާހަގަކުރެވެނީ، ބްރޯޑްކާސްޓްކުރުން ވަކި ހަމައަކުން ދައުލަތުގެ އިދާރާއަކުން ރެގިއުލޭޓްކުރުމަށް ދެވޭ އިހުތިޔާރަކީ ޗާޕްކޮށްގެންނާއި އޮންލައިންކޮށް ހިންގާ ނޫސްތަކުގެ މައްޗަށް ވެސް އޮތް އިހުތިޔާރެއްކަމަށް ހަދައި، މި ދެކަމުގައި އޮތް އަސާސީ ފަރަގު ވެސް އޮޅުވާލައިގެން، ނޫސްތަކުގެ މައްޗަށް ބާރުހިންގައި ނޫސްވެރިކަމުގެ މިނިވަންކަން ނަގާލުމަށް މާއްދާތައް ހިމަނާފައިވާކަންކަމަށެވެ.
ޑިމޮކްރެޓިކް ނިޒާމެއްގެ ތެރެއިން، ނޫސް ހިންގުން ވާންޖެހެނީ ފުރިހަމައަށް އެއްކޮށް އަމިއްލައަށް ރެގިޔުލޭޓްކުރެވިގެން ހިންގޭ ނޫސްވެރިކަމަކަމަށް ދަ ޑިމޮކްރެޓްއިން ބުނެއެވެ. އަދި އެމަގަށް ގެންދިއުމަށް އިތުރަށް ކުރަންޖެހޭ މަސައްކަތް ވަނިކޮށް، އެއާ ހިލާފަށް ޤާނޫނަށް މިހާރު ހުށަހަޅާފައިވަނީ މިހާރު އޮތް ހާލަތަށްވުރެ ވެސް ބޮޑުތަނުން ގޯސްކޮށް ނުވަތަ ބޮޑުތަނުން ނޫސްތައް ދައުލަތުގެ އިދާރާއަކުން ރެގިޔުލޭޓްކުރުމަށާއި އެ އިދާރާ އަތުރާލާފައިވަނީ ވެސް ރައީސުލްޖުމްހޫރިއްޔާއަށް ކޮންޓްރޯލް އޮންނަ ގޮތުގައިކަން ކަންބޮޑުވުމާއެކު ފާހަގަކުރާކަމަށްވެސް ޑެމްސްގެ ނޫސް ބަޔާނުގައިވެއެވެ.
ނޫސްވެރިކަމުގެ މިނިވަންކަން ނަގާލުމުގެ މިފަފަ ބިލެއް ރައްޔިތުންގެ މަޖިލީހުން ފާސްނުކުރުމަށް ދަ ޑިމޮކްރެޓްސް ވަނީ ގޮވާލާފައެވެ.
