މާލޭން ދެކުނުގެ ރަށަކަށް ނިސްބަތްވާ މި އަންހެން މީހާވަނީ، 2020 ވަނަ އަހަރު ޖުލައި، އޮގަސް އަދި ސެޕްޓެމްބަރު މަހު ސަރުކާރުން އިންކަމް ސަޕޯޓްގެ ގޮތުގައި 7500 ރުފިޔާ ހޯދާފައެވެ. އަންހެން މީހާގެ މައްޗަށް އިއްވާފައިވާ ހުކުމުން އެނގޭ ގޮތުގައ އެ ފައިސާ އޭނާ ހޯދާފައިވަނީ އިކޮނޮމިކް މިނިސްޓްރީއަށް ސައްހަ ނޫން މައުލޫމާތު ދީގެންނެވެ.
ކޮވިޑާ ގުޅިގެން އާމްދަނީއަށް ނުރަނގަޅު އަސަރު ކުރި މީހުންނަށް ކުރީ ސަރުކާރުން އިންކަމް ސަޕޯޓް ދިނެވެ. އޭގެ ތެރެއިން ބައެއް މީހުން އެ ފައިސާ ހޯދާފައިވަނީ އޮޅުވާލައިގެންކަން ފަހުންވަނީ އެނގިފަ އެވެ.
މި މައްސަލައިގައި ދައުލަތުން އެ އަންހެން މީހާއާ ދެކޮޅަށް ދައުވާކޮށްފައިވަނީ ދައުލަތުގެ އިދާރާއެއް ހިމެނޭ އިދާރީ ތަބީއަތުގެ ދައުވާއެވެ. އަންހެން މީހާ ނިސްބަތްވާ ރަށުގެ މެޖިސްޓްރޭޓް ކޯޓަށް ހުށަހެޅުނު މި މައްސަލައިގެ ހުކުމް އިއްވާފައިވަނީ އަންހެން މީހާގެ ގައިރު ހާޒިރުގައެވެ. މައްސަލައިގެ ހުކުމުގައިވަނީ އޮޅުވާލައިގެން ހޯދި ފައިސާ، އަށް މަހަށް ބަހާލައިގެން ދައްކާ ހަލާސް ކުރުމަށެވެ.
އިލެކްޝަންސް ކޮމިޝަންގެ ދަފްތަރުން ދައްކާ ގޮތުގައި މި އަންހެން މީހާއަކީ ޕީޕީއެމްއަށް ނިސްބަތްވާ މީހެކެވެ.
