އެ މަސައްކަތުގެ އެއްބަސްވުމެއްގައި ސޮއިކުރީ ހުޅުމާލޭ ހޮސްޕިޓަލްގައި މިއަދު ބޭއްވި ރަސްމިއްޔާތެއްގަ އެވެ. އެގޮތުން އެ އެއްބަސްވުމުގައި ސޮއިކުރީ މާލެ ގުރޫފް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގު ހަލީމް އާއި އާރްޑީސީގެ މެނޭޖިން ޑިރެކްޓަރު އަލީ ޒުހައިރެވެ.
ހުޅުމާލޭ ހޮސްޕިޓަލް އިން ކުރި ޕޯސްޓެއްގައި ބުނީ ޒަމާނީ ފެންވަރުގެ ހިދުމަތާއެކު އިތުރު 14 އެނދު އިމަޖެންސީ ރޫމް އަށް އިތުރު ކުރެވޭނެ ކަމަށެވެ. އަދި އަޕްގްރޭޑް ކުރާ އީއާރުގައި ޓްރޯމާ އާއި އެކްސިޑެންޓްތަކުން ފެށިގެން މެޑިކަލް އެމަޖެންސީތަކާ ހަމައަށް ގިނަ ކްރިޓިކަލް ހާލަތްތަކެއް ބެލެހެއްޓޭނެ ކަމަށް އެ ހޮސްޕިޓަލުން މައުލޫމާތުދެއެވެ.
ހުޅުމާލޭ ހޮސްޕިޓަލްގެ އިމަޖެންސީ ރޫމް ގައި މިހާރު ހުންނަނީ 7 އެނދެވެ.
އާ ހިދުމަތްތަކާއެކު ޓާޝަރީ ފެންވަރުގައި ހުޅުމާ ހޮސްޕިޓަލް ރަސްމީކޮށް ހުޅުވީ މިދިޔަ ހޮނިހިރު ދުވަހުގަ އެވެ.
އެ ހޮސްޕިޓަލްގައި އަލަށް އިފްތިތާހު ކުރި ހިދުމަތްތަކުގެތެރޭގައި 10 އެނދުގެ އައިސީޔޫ ، ނިއޯނޭޓަލް ވެންޓިލޭޓާ ހިމެނޭ 14 އެނދުގެ އެންއައިސީޔޫ ،ސްޓެރައިލް ސާވިސް ޑިޕާޓްމަންޓް ސީއެސްއެސްޑީ އެއް އަދި މުޅިން އާ 4 އޮޕަރޭޝަން ތިއޭޓަރު ހިމެނެއެވެ.
