މީގެ ތެރެއިން އެންމެ ބޮޑު އަދަދެއް ހަރަދުކޮށްފައިވަނީ އިންފްރާސްޓްރަކްޗާ އެސެޓްތަކަށެވެ.
ފިނޭންސް މިނިސްޓްރީން އާންމުކުރި ވީކްލީ ފިސްކަލް ޑިވެލޮޕްމަންޓްސް ރިޕޯޓުގައިވާ ގޮތުން، އިންފްރާސްޓްރަކްޗާ އެސެޓްތަކަށް 4.5 ބިލިއަން ރުފިޔާ ހަރަދުކޮށްފައިވެ އެވެ. ނަމަވެސް މިއީ މިދިޔަ އަހަރުގެ މި މުއްދަތާ އަޅާބަލާއިރު ދެ ބިލިއަން ރުފިޔާ މަދު އަދަދެކެވެ.
ބިމާއި އިމާރާތްތަކަށް ކުރި ހަރަދުތަކަށް ބަލާއިރު، ބަޖެޓުގައި ކަނޑައެޅި މިންވަރަށް ވުރެ 1.2 ބިލިއަން ރުފިޔާ އިތުރަށް ހަރަދުކޮށްފައިވާ އިރު، ކެޕިޓަލް އިކުއިޕްމަންޓަށް 357.1 މިލިއަން ރުފިޔާ އިތުރަށް ހަރަދުކޮށްފައިވެ އެވެ.
ޕީއެސްއައިޕީ މަޝްރޫއުތަކަށް މިހާތަނަށް އަށް ބިލިއަން ރުފިޔާ ހަރަދުކޮށްފައިވާ އިރު، މިހާރު ބާކީ އޮތީ 900 މިލިއަން ރުފިޔާ އެވެ. މި މަޝްރޫއުތަކުގެ ތެރޭގައި ބިން ހިއްކުމާއި، އެއަރޕޯޓު އެޅުމާއި، ބަނދަރު ހެދުމާއި، މަގު ހެދުމާއި ގެދޮރު އެޅުން ހިމެނެ އެވެ.
ކެޕިޓަލް ހަރަދަކީ ކޮބާ؟
ކެޕިޓަލް ހަރަދަކީ ދައުލަތުން ދިގު މުއްދަތަކަށް ބޭނުންކުރެވޭ އެސެޓްތައް ހޯދުމަށް ނުވަތަ އުމްރާނީ ތަރައްގީއަށް ކުރާ ހަރަދުތަކެވެ. މީގެ ތެރޭގައި:
- އިމާރާތްތައް އެޅުން
- މަގުތައް ހެދުން
- ބަނދަރު ހެދުން
- ބޮޑެތި މެޝިނަރީ ގަތުން
- ބިން ހިއްކުން
- އެއަރޕޯޓު އެޅުން
- ސްކޫލް، ހޮސްޕިޓަލް ފަދަ ތަންތަން އެޅުން
- ބޮޑެތި އިކުއިޕްމަންޓް ގަތުން
މި ހަރަދުތަކަކީ އާންމުކޮށް އެއް އަހަރަށްވުރެ ގިނަ ދުވަހަށް ބޭނުންކުރެވޭ އަދި ގައުމުގެ އިގްތިސާދީ އަދި އިޖުތިމާއީ ތަރައްގީއަށް މަގުފަހިކޮށްދޭ ހަރަދުތަކެވެ. މިއީ ދައުލަތުގެ ރިކަރަންޓް ހަރަދު (މުސާރަ، އޮފީސް ހިންގުން ފަދަ ދުވަހުން ދުވަހަށް ކުރަންޖެހޭ ހަރަދު) ތަކާ ތަފާތު ހަރަދުތަކެކެވެ.
