ރައްޔިތުންގެ މަޖިލީހަށް މި އިސްލާހު ހުށަހެޅީ، ސަރުކާރުގެ ފަރާތުން ހުޅުދޫ ދާއިރާގެ މެންބަރު މުހައްމަދު ޝާހިދުއެވެ.
ޕީއެންސީގެ ސުޕަ މެޖޯރިޓީން ބިލު ބަލައިގަނެ، އެ ބިލު ވަނީ މުޅި މަޖިލީހުގެ ކޮމިޓީއަށް ފޮނުވާފައެވެ. އަދި ކޮމެޓީ މަސައްކަތް ނިންމާ މިއަދު ހަވީރު 5:30ގައި އެ ބިލަށް ތަޅުމުގައި ގޮތެއް ނިންމަން ޖަލްސާއެއް ވަނީ އެޖެންޑާކޮށްފައެވެ.
ބިލުގެ މަސައްކަތް ކުރަމުން އަންނަނީ މުޅި މަޖލީހުގެ ކޮމެޓީންނެވެ. ހވޯޓިން ސިސްޓަމަށް މައްސަލަ ޖެހިފައިވާ ކަމަށް ބުނެ މަޖިލީހުގެ ޖަލްސާ މެންދުރުފަހު 13:45 މެދުކަނޑާލިއެވެ. އޭގެ 15 މިނެޓް ފަހުން އަނެއްކާވެސް ޖަލްސާ ފެއްޓުމަށްފަހު ޓެސްޓް ވޯޓެއް ނެގުމުން ސިސްޓަމް ރަނގަޅު ނޫންކަމަށް ބައެއް މެމްބަރުން އަނެއްކާވެސް ވިދާޅުވިއެވެ.
ސިސްޓަމް މައްސަލަ ޖެހިއްޖެކަން މަޖިލީހުގައި ރިޔާސަތުގައި އިންނެވި އަބްދުއްރަހީމް އަބްދުﷲ ވިދާޅުވިއެވެ، އެއާއި އެކު އިސްލާހުތަކަށް ވޯޓަށް އަހަމުން އަންނަނީ ވަކިވަކި މެމްބަރުންގެ ނަން ގޮވައި އަނގަބަހުން ވޯޓް ދޭ ގޮތަށް "ރޯލްކޯލް ވޯޓު" ނެވެ.
މަޖިލީހުގައި މިގޮތަށް ނަން ގޮވައިގެން އެންމެ ފަހުން ވޯޓަކަށް އެހީ 18 ވަނަ ރައްޔިތުން މަޖިލީހުގައެވެ. އެ ވޯޓަކީ އޭރު މަޖިލީހުގެ ރައީސަކަށް އިންނެވި އަބްދުﷲ މަސީހް މަގާމުން ވަކިކުރަން ނެގި ވޯޓެވެ.
