މިނިސްޓްރީ އޮފް ސްޕޯޓްސް ފިޓްނަސް އެންޑް ރިކްރިއޭޝަނުން ހާމަ ކުރި ގޮތުގައި މާޒިޔާއަށް މިހާތަނަށް 1،806،441.56 ރުފިޔާ ސަރުކާރުންވަނީ ދީފައެވެ. އެއީ، މިދިޔަ އަހަރުގެ އޭއެފްސީ ކަޕަށް ބަންގްލަދޭޝްއަށް ދިޔުމަށް ދިން 350،558.28 ރުފިޔާއާއި، މިދިޔަ އަހަރު އޭއެފްސީ ކަޕަށް އިންޑިޔާއަށް ދިޔުމަށް ދިން 408،383.28 ރުފިޔާ ހިމެނޭ ގޮތުންނެވެ.
މިނިސްޓްރީން ހާމަކުރި މާލީ ހިސާބުތަކުން ދައްކާ ގޮތުގައި މި އަހަރުގެ އޭއެފްސީ ކަޕަށް ތައްޔާރުވުމަށް މާޒިޔާ ވަރުގަދަ ކުރުމަށް ދެ ފަހަރެއްގެ މަތިން ޖުމްލަ 800،000 ރުފިޔާ މާޒިޔާއަށް ސަރުކާރުން ދީފައިވެއެވެ. އެއީ، ޖޫން މަހު ތިން 500،000 ރުފިޔާ އަދި ޖުލައި މަހު ދިން 300،000 ރުފިޔާއެވެ. މީގެ އިތުރުން މި އަހަރުގެ ފުޓްބޯޅަ ސީޒަނަށް ތައްޔާރުވުމަށް މާޒިޔާއަށް ސަރުކާރުން، 247،500 ރުފިޔާ ދިނެވެ. މި އަހަރުގެ ފުޓްބޯޅަ ސީޒަނަށް ތައްޔާރުވާން މާޒިޔާއަށް ސަރުކާރުން ފައިސާ ދިން އިރު، މި އަހަރުގެ ފުޓްބޯޅަ ސީޒަނެއް ނެތެވެ. އަންނަ ސީޒަން ފަށާނެ ރަސްމީ ވަކި ތާރީހެއް އަދި ކަނޑަނާޅައެވެ.
މި ސަރުކާރުން މިހާތަނަށް މާޒިޔާއަށް 1.8 މިލިއަން ރުފިޔާ ދީފައިވާއިރު، އެމްޑީޕީ ސަރުކާރުގެ ފަހު އަހަރު މާޒިޔާއަށް ފަސް މިލިއަން ރުފިޔާ ދިން ކަމަށް މިނިސްޓްރީން ބުންޏެވެ. 2023 ވަނަ އަހަރު، މާޒިޔާއަށް ދިވެހި ސަރުކާރުން ޖުމްލަ، 5،226،132.13 (ފަސް މިލިއަން، ދެ ލައްކަ ސައްބީސް ހާސް، އެއް ސަތޭކަ ބައްތިރީސް ރުފިޔާ، އަށާވީސް ލާރި) ދީފައިވާ ކަމަށް ކުޅިވަރު މިނިސްޓްރީން ބުންޏެވެ.
