Advertisement

2026 ވަނަ އަހަރަށް ދައުލަތުގެ ދަރަނި 95 ޕަސަންޓަށް ތިރިކުރުމަށް ކަނޑައެޅި އަމާޒު ހާސިލެއް ނުވާނެ ކަމަށް ފިނޭންސް މިނިސްޓްރީން ބުނެފި އެވެ.
އަންނަ އަހަރުގެ ބަޖެޓު ފޮތުގައި ބުނެފައިވާ ގޮތުން، ފިސްކަލް ރިފޯމުތައް ލަސްވެ، ޑެފިސިޓް ބޮޑުވެ، އިތުރު ދަރަނި ނަގަން ޖެހުމުގެ ސަބަބުން މި އަމާޒު ހާސިލެއް ނުވާނެ އެވެ. އަދި މި އަހަރު ޑެފިސިޓް ވަނީ 15 ބިލިއަން ރުފިޔާއަށް އަރައިފަ އެވެ.
ފިނޭންސް މިނިސްޓްރީން ބުނީ ދަރަނި ކުޑަކުރަން ބޭނުންވާ ނަމަ، މިހާރު ބަޖެޓުގައި ހިމަނާފައިވާ ހަރަދު ކުޑަކުރުމުގެ ފިޔަވަޅުތަކުގެ އިތުރުން އާ ފިޔަވަޅުތަކެއް އަޅަން ޖެހޭނެ ކަމަށެވެ. އެ ނޫން ގޮތަކަށް މެދުރާސްތާގައި ދަރަނި ކުޑައެއް ނުކުރެވޭނެ އެވެ.
މި އަހަރު ނިމޭއިރު ޖުމުލަ ދަރަނި 139 ބިލިއަން ރުފިޔާއަށް އަރާނެ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކާ އިރު، އަންނަ އަހަރު އެ އަދަދު 150 ބިލިއަން ރުފިޔާއަށް މައްޗަށް ދާނެ ކަމަށް ލަފާކުރެ އެވެ.