ސަރުކާރަށް އަހަރެއް ފުރުމާ ގުޅިގެން ޑރ. ވަހީދު ދެއްވި ބަސްދީގަތުމެއްގައި ވިދާޅުވީ ފަލަސްތީނުގައި ހިންގަމުންދާ ގަތުލު އާންމު ހުއްޓުވުމަށް ދިވެހި ސަރުކާރުން ކުރަމުންގެންދާ މިންނެތް މަސައްކަތް އުފަލާ އެކުގައި ފާހަގަކުރައްވާ ކަމަށެވެ.
ރައީސް މުއިއްޒުގެ ސަރުކާރުގެ ހާރިޖީ ސިޔާސަތުގެ ތެރެއިން ވަކިން ހާއްސަކޮށް ފަލަސްތީނު މައްސަލައިގައި މިސަރުކާރުން އަޅަމުންދާ ފިޔަވަޅުތަކަކީ ރާއްޖޭގެ ތާރީހުގައި އެއްވެސް ސަރުކާރަކުން އަަޅާފައި ނުވާވަރުގެ ހަރުދަނާ ފިޔަވަޅުތަކެއް ކަމުގައި ރައީސް ވަހީދު ވިދާޅުވި އެވެ.
ވަހީދު ވިދާޅުވީ، މިދިޔަ އަހަރު ވެރިކަން ބަދަލުވިއިރު، ރާއްޖެ އަށް ކުރިމަތިވެފައިވާ ގިނަ މައްސަލަތަކެއް ހުރި ކަމަށެވެ. އޭގެ ތެރޭގައި ހާރިޖީ އަދި ދާހިލީ އަދި އިގްތިސާދީ ގޮތުން ގޮންޖެހުންތަކެއް ހުރި ކަމަށް ވިދާޅުވި އެވެ.
އެގޮތުން ދައުރު ބަދަލުވިއިރު ބައެއް ގައުމުތަކާ މެދު ދިވެހިންގެ ހިތްހަމަނުޖެހުން ތަކެއް ހުރި ކަމަށާއި އޭރު އިންޑިއާއެކު އޮތް ޒަމަންވީ ގުޅުމާ މެދު ވެސް ސުވާލުތަކެއް އުފެދިފައި ހުރި ކަމަށް ވަހީދު ވިދާޅުވި އެވެ.
އިންޑިއާގެ އިތުރުން ޗައިނާ އާއި ރާއްޖޭގެ ގުޅުމަށް ވެސް އެ ދުވަސްވަރު ނޭދެވޭ އަސަރުތަކެއް ކޮށްފައިވާ ކަމަށާއި އެކަމަކު ރައީސް މުއިއްޒު ވެރިކަމާ ހަވާލުވެވަޑައިގެންނެވިތާ މާގިނަ ދުވަހެއް ނުވެ، އެ ގުޅުންތައް ބަދަހިކުރަން ގިނަ މަސައްކަތްތްޕުޅުތަކެއް ކުރެވި ކަމަށް ވަހީދު ވިދާޅުވި އެވެ.
އިގްތިސާދީ ގޮތުން ގައުމު ކުރިމަތިލާންޖެހިފައިވާ ގޮންޖެހުންތަކަށް ހައްލު ހޯދުމަށް ސަރުކާރުން ކުރަމުންދާ މަސައްކަތްތަކަށްވެސް ރައީސް ވަހީދު ތައުރީފް ކުރެއްވި އެވެ. ދައުލަތުގެ ހަރަދުތައް ކުޑަކުރުމާއި، އާމްދަނީ އިތުރުކުރުމަށް އަޅަމުންދާ ފިޔަވަޅުތަކަކީ ފަސޭހަ ފިޔަވަޅުތަކެއް ނޫން ކަމަށާއި، ނަމަވެސް މި މަސައްކަތުގައި ސަރުކާރަށް އެއްބާރުލުން ދިނުމަކީ ހުރިހާ ރައްޔިތުންގެވެސް ޒިންމާއެއް ކަމުގައިވެސް ރައީސް ވަހީދު ވިދާޅުވި އެވެ.
