ހުޅުމާލެ ސަހަރާ މިސްކިތައް މިރޭ އިރުއޮއްސޭ ނަމާދަށް ދިޔަ މީހަކު "ސީއެންއެމް" އަށް ބުނީ އެމީހާ ފުރަތަމަ މަސައްކަތް ކުރީ މިސްކިތުގެ އިމާމަށް ހަމަލާ ދޭން ކަމަށާއި ނަމަވެސް އެކަން ކާމިޔާބު ނުވެ، އެ ސަރަހައްދުން ދާން މަސައްކަތް ކުރުމުން ފުލުހުން އޭނާ ހުއްޓުވަން މަސައްކަތް ކުރުމުން ފުލުހުންނަށް ވެސް ވަޅިން ބިރު ދެއްކި ކަމަށެވެ.
ދިވެހި ފުލުހުންގެ ހިދުމަތުން މިރޭ ބުނީ، ހުޅުމާލެ ފޭސް އެކެއްގައި ތޫނު އެއްޗެއް ބޭނުން ކޮށްގެން މީހަކަށް ހަމަލާ ދޭން އުޅުނު ކަމުގެ ތުހުމަތުގައި 33 އަހަރުގެ ދިވެހި ފިރިހެނަކު މިއަދު 18:30 ހާއިރު ހައްޔަރުކޮށްފައިވާ ކަމަށެވެ.
އަދި އެވަގުތު އެ މީހާ ހުއްޓުވަން އުޅުނު ފުލުހަކަށްވެސް ތޫނު އެއްޗެއް ބޭނުންކޮށްގެން ހަމަލާ ދޭން މަސައްކަތް ކޮށްފައިވާ ކަމަށެވެ.
ފުލުހުން އެމީހާ ހަައްޔަރު ކުރި މަންޒަރު ފެންނަ ވީޑިއޯ ވަނީ އާންމު ކޮށްފަ އެވެ. އެމީހާ ހައްޔަރު ކުރުމުން ބުނީ އޭނާ އަކީ ނަފްސާނީ ބަލި މީހެއް ކަމަށެވެ.
މި މައްސަލަ ފުލުހުން އަންނަނީ އިތުރަށް ތަހުގީގު ކުރަމުންނެވެ.
